Ermənistan özünü "ağıllı" aparır - Türkiyə ilə sərhədlər açıla bilər
Türkiyə və Ermənistan arasındakı münasibətlər uzun illərdir ki, gərgin olaraq qalır. Lakin 2020-ci ildə baş verən 44 günlük Vətən müharibəsindən sonra Azərbaycanın öz torpaqlarını azad etməsi bölgədə yeni siyasi reallıqlar formalaşdırıb. Artıq iki ölkə arasında normallaşma prosesinin mümkünlüyü müzakirə olunur.
Ermənistanın bəzi öhdəlikləri yerinə yetirməsi və son zamanlar daha çevik siyasət aparması bu prosesə təkan verə bilər. Türkiyənin Ermənistanla münasibətləri tədricən bərpa etməsi və sərhədlərin açılması məsələsi gündəmə gəlməkdədir.
Politoloq Mütəllim Rəhimli Ermənistan və Türkiyə arasındakı mövcud siyasi vəziyyət və normallasma yolunda atılan addımlarla bağlı Crossmedia.az-a açıqlama verib:
"Ermənistan müstəqilliyini elan edəndən bəri Türkiyə onu tanımayib və siyasi, iqtisadi əməkdaşlıq etməyib. Bunun əsas səbəbi isə Ermənistanın Qarabağı işğal etməsi olub. Artıq Qarabağ və işgal altında olan digər torpaqlarımız azad olunub. Ermənistan 2020-ci il 44 günlük müharibədən sonra üzərinə öhdəliklərin böyük əksəriyyətinə əməl edib. Yalnız Zəngəzur dəhlizinin açılması məsələsi reallaşdırılmayıb. Bunun isə köklü səbəbləri var və düşünürəm ki, yalnız Ermənistan və Azərbaycandan asılı deyil. Bütün bunları nəzərə alaraq demək olar ki, Türkiyə ilə Ermənistan arasında münasibətlərin normallaşması istiqamətində addımlar atıla bilər".
Politoloq Ermənistan və Türkiyə arasında sərhədlərin açılma ehtimalından danışıb:
"Türkiyə ilə əlaqələrin yaradılması, sərhədlərin açılması Ermənistanın iqtisadi inkişafına təkan verəcək. Əlaqələrin bərpa edilməsi istiqamətində xeyli vaxtdır ki, iki ölkə arasında danışıqlar aparılır. Türkiyə Ermənistanla əməkdaşlıq məsələləri ilə bağlı Azərbaycanla razılaşdırmadan qərar vermir. Simonyanın inamlı fikirləri çox güman ki, rəsmi Azərbaycandan əldə edilmiş pozitiv fikirlərə də söykənir. Bundan sonra Türkiyə öz sərhədlərinin açılması ilə bağlı şərtlərini müəyyənləşdirməlidir. Çünki Ermənistan özünü son vaxtlar "ağıllı" aparmağa başlayıb. Ona görə də Türkiyə tədricən, tam olaraq yox, sərhəd buraxılış məntəqələrində yumşalmalara gedə bilər. Onu da qeyd etmək lazımdır ki, sərhədlərin açılması geniş anlayışdır. Özundə bir çox addımları ehtiva edir".
Ayhan Ağarzayev
18:50 21.02.2025
Oxunuş sayı: 13043
