İrəvan niyə 10 noyabr bəyanatından imtina edir? - Ermənistandan Rusiyaya açıq mesaj
Ermənistanın Təhlükəsizlik Şurasının katibi Armen Qriqoryan bildirib ki, rəsmi İrəvan 10 noyabr 2020-ci il tarixli üçtərəfli bəyanata qayıtmaq məsələsini nəzərdən keçirmir. Qriqoryan bunu xüsusilə sənədin doqquzuncu maddəsinin işləməməsi ilə əlaqələndirib. Bəzi ekspertlər bunu İrəvanın Moskvadan uzaqlaşmasının növbəti təzahürü kimi qiymətləndirirlər.
Bu açıqlama fonunda bəzi ekspertlər Ermənistanın bu mövqeyini müxtəlif səbəblərlə əlaqələndirirlər.
Qriqoryanın açıqlaması barədə Crossmedia.az-a danışan politoloq Məhəmməd Əsədullazadə bildirib ki, bunun əsas səbəbi bəyanatda Zəngəzur dəhlizinin açılması və burada Rusiyanın nəzarətinin nəzərdə tutulmasıdır.
Politoloq qeyd edib ki, bəyanatın səkkizinci bəndi hərbi əsirlərin geri qaytarılmasını nəzərdə tutur: "Ermənistan isə Azərbaycanda hələ də hərbi əsirlərin olduğunu iddia edərək bu məsələni təhrif etməyə çalışır. Əslində, Azərbaycan 10 noyabr bəyanatının əksər bəndlərini artıq yerinə yetirib və hazırda əsas müzakirə mövzusu Zəngəzur dəhlizinin açılmasıdır. Ermənistan bu bəyanatdan imtina etməyə çalışır. Çünki son beş ildə vəziyyət dəyişib və Ermənistanın konstitusiyasında da dəyişikliklər baş verib. O hesab edir ki, Zəngəzur dəhlizi açılacaq və bu yolun nəzarəti Azərbaycanla razılaşdırılacaq. Rusiya isə bu dəhlizə nəzarət etməyəcək. Ermənistan 10 noyabr bəyanatının doqquzuncu bəndini yerinə yetirməkdən yayınaraq Rusiyaya mesaj verməyə çalışır ki, artıq bu məsələdə Moskvanın iştirakına ehtiyac görmür".
Politoloqun fikrincə, Ermənistanın bu addımı, Rusiyaya ünvanlanmış açıq bir mesajdır.
Fatimə Məmmədova
15:13 21.02.2025
Oxunuş sayı: 2502
