Ermənistandan yeni addım: Danışıqlar formatı dəyişir?
Ermənistan parlementinin sədri Alen Simonyan Azərbaycan Ermənistan münasibətlərinin həlli prosesində vasitəçi kimi Rusiyaya ehtiyac olmadığını bildirib: "Fikrimcə, bu, çətin ki, mümkün olsun. Əlbəttə, biz hər bir konkret təklifi müzakirə edirik, lakin keçmiş təcrübə çoxlu sayda pis xatirələr qoyub, hələ də cavabsız qalan çox suallarımız var".
Ermənistanın son zamanlar Rusiyadan üz döndərib Avropaya yönəlməsi Simonyanın bu açıqlamasının şəffaflığına kölgə salır. Ermənistan vasitəçilik edəcək dövlət istəmir yoxsa bu münasibət tək Rusiyaya aiddir?
Mövzu ilə bağlı politoloq Oqtay Qasımlı Crossmedia.az saytına açıqlama verib:
"Simonyanın bu cür açıqlamaları ilə ilk dəfə rastlaşmırıq. Bu gün Ermənistan Rusiyanın vasitəçiliyini qəbul etmədiyini açıq şəkildə ifadə edir. Bunu da müxtəlif səbəblərlə əsaslandırmağa çalışır. Şübhəsiz, bu o anlama gəlmir ki, Ermənistan vasitəçisiz Azərbaycanla birbaşa danışmaq üçün Rusiyanın vasitəçiliyini istəmir. Nəzərə almaq lazımdır ki, vasitəçisiz birbaşa danışıqlar formatını Azərbaycan 2023-cü ilin noyabrında təklif edib. Bunun da əsas səbəbi ondan ibarət idi ki, vasitəçi qismində iştirak edən tərəflər proseslərə lazımsız müdaxilələr edirdi. Rusiya və ABŞ danışıqlar prosesində bitərəf mövqelərini qoruya bilmədikləri üçün Azərbaycan bu təklifi irəli sürməyə məcbur oldu".
O. Qasımov Ermənistanın vasitəçilik istəməməsinin səbəbini izah edib:
"Ermənistan hazırda çox istəyər ki, 2021-2023-cü il danışıqlarına qayıtsın və danışıqlar formatı Avropa ittifaqının yaxud ABŞ-nin vasitəçiliyi ilə həyata keçirilsin. Bu formatın onun maraqlarına uyğun olduğunu hesab edir. Amma təbii ki, Azərbaycan birmənalı olaraq bununla razılaşmır".
Politoloq Rusiyanın hələki Cənubi Qafqaza təsir edə bilməyəcəyini bildirib: "Müşahidə edirik ki, son üç ildə Ermənistan açıq şəkildə Rusiyanın mənafeyinə zidd addımlar atır. Rusiya isə bu proseslərə çox təmkinlə yanaşır. Bu baxımdan Ermənistan Rusiya münasibətlərinin gərginliyi bölgədəki təhlükəsizliyə təsir göstərə bilər. Amma hazırda Rusiyanın əsas diqqəti Ukrayna cəbhəsinə yönəldiyi üçün düşünmürəm ki, yaxın dövrdə Cənubi Qafqazdakı proseslərə ciddi müdaxilə edə bilsin".
Ayhan Ağarzayev
16:43 11.02.2025
Oxunuş sayı: 11249
