Ermənistanın "dayı" dediyi ayının məqsədi: Regionda yeni gərginliyə zəmin
Erməniəsilli siyasətçi, HDP-nin keçmiş millət vəkili Qaro Paylan son açıqlamasında Ermənistanın Azərbaycanla normallaşma adı altında vaxt qazandığını və Fransa ilə ABŞ-dan silah aldığını iddia edib. Siyasətçi, həmçinin 3-5 ildən "itirdikləri torpaqları azad edə bikəcəklərini" deyib.
Bu revanşist əhval- ruhiyyənin növbəti, ən bariz nümunələrindən biridir. Keçmiş millət vəkili əslində həm də öz siyasi səbatsızlığını göstərək Ermənistan hakimiyyətini pis vəziyyətə qoyur.
Səslənən bəyanatlarda məqsəd ya həqiqətən, Ermənistan hakimiyyətini hədəf almaqdır, ya da regionda "suları bulandırmaq", Bakı - İrəvan normallaşmasına mane olmaq. Hərçənd üçüncü variant, Q. Paylanın rəsmi İrəvanın dilindən danışması da istisna deyil.
Mövzu ilə bağlı hərbi ekspert Şair Ramaldanov Crossmedia.az-a açıqlamasında bildirib ki, Ermənistan həmişə sözlə və əməldə tamamilə fərqli mövqe sərgiləməsi ilə seçilir:
“Azərbaycanın işğal dövründən Vətən müharibəsinə qədər olan müddətdə Ermənistanla danışıqlar masasına oturduqda və ya müxtəlif beynəlxalq platformalarda Azərbaycan və Ermənistanın rəhbərləri görüşəndə belə bir təəssürat yaranırdı ki, guya Ermənistan sülh tərəfdarıdır və özünü sülhsevər bir ölkə kimi qələmə verir. Lakin Vətən müharibəsində Azərbaycanın qələbəsindən sonra Ermənistan reallıqla barışmaq istəmir. Bu gün yeni havadarlar axtarışında olan Ermənistanın silahlandırılması region üçün təhlükəli bir siyasi istiqamətə çevrilmişdir”.
Hərbi ekspertin fikrincə, Ermənistan silahlandıqca ritorikasında da dəyişikliklər müşahidə olunur və revanşist qüvvələrin baş qaldırması açıq şəkildə görünür:
“Ermənistan hakimiyyəti öz hakimiyyət ömrünü uzatmaq üçün, ayıya "dayı" deməyə də hazırdır. Bu gün Ermənistanın tutduğu mövqe nə ölkənin gələcəyinə, nə də Ermənistan xalqının gözləntilərinə uyğun gəlir və region üçün ciddi təhlükə yaradır".
Ramaldanov Ermənistanın müstəqil siyasət yeridə bilmədiyini və həmişə havadarlarının sifarişlərini yerinə yetirdiyini vurğulayır: “Ermənistanda hakimiyyətə kimin gəlməsindən asılı olmayaraq, ölkə heç vaxt müstəqil siyasət yeritməmiş və regionda gərginlik yaradan bir xətt tutmuşdur. Ermənistanın silahlandırılmasının arxasında məqsəd var: regionda yeni münaqişə ocaqları yaratmaq”.
Hərbi ekspert hesab edir ki, Ermənistanın havadarları ölkənin siyasətini sülhə deyil, müharibəyə yönləndirir və bu da sülh müqaviləsinin imzalanmasına mane olur:
“Ermənistanın silahlandırılması, guya Azərbaycandan gələn təhlükə bəhanəsi ilə əsaslandırılır. Əgər Ermənistan daim silahlandırılarsa, sülh müqaviləsi imzalansa və demokratik institutlar sürətlənərsə, artıq Azərbaycandan gələn ‘təhlükə’ anlayışı gündəmdə maraqlı olmayacaq. Azərbaycan Prezidenti İlham Əliyev də son çıxışlarında Ermənistanın silahlandırılmasına sərt münasibət bildirib. Dövlət başçısı Ermənistanın havadarlarının bu prosesi dayandırmalı olduğunu və hətta Ermənistana göndərilən silahların geri qaytarılmasının vacibliyini vurğulayıb.
Bu, çox ciddi bir mesajdır və Ermənistanın gələcək siyasi addımlarına yönəlik açıq xəbərdarlıqdır. Azərbaycan gözləyə bilməz ki, Ermənistan tam silahlanıb hazır vəziyyətə gəlsin. Ermənistan nə qədər silahlansa da, silahlanma yarışında Azərbaycana çata bilməyəcək”. - deyə o qeyd edib.
Ramaldanov bildirib ki, Ermənistanın təhlükəli siyasəti fonunda Azərbaycan təhlükəsizlik zonaları yaratmaq üçün ciddi addımlar ata bilər:
“Hər bir dövlət öz sərhədləri daxilində yerləşən yaşayış məntəqələrinin və mülki əhalinin təhlükəsizliyini təmin etməyə borcludur. Bu baxımdan, Ermənistanın təxribatçı siyasətinə qarşı Azərbaycanın təhlükəsizlik zonalarının yaradılması üçün addımlar atması istisna deyil”.
Hərbi ekspert Türkiyənin Suriyada yaratdığı təhlükəsizlik zonalarına istinad edərək, bu cür nümunələrin beynəlxalq praktika üçün tanınmış yanaşma olduğunu vurğulayıb.
Ş.Ramaldanov əlavə edib ki, Azərbaycan həm əməldə, həm də sözdə sülh müqaviləsinin imzalanmasında maraqlıdır:
“Bu, sadəcə sözlə deyil, real niyyətdir. Ancaq sülh müqaviləsi birtərəfli qaydada imzalana bilməz. Ermənistan da bu müqaviləyə hazır olmalı və öhdəliklərini yerinə yetirməlidir. Əks halda, regionda yenidən münaqişə ocaqları alovlana bilər”.
Ramaldanovun fikrincə, bütün bu proseslərdə uduzan tərəf Ermənistan olacaq: “Azərbaycan dövləti və Silahlı Qüvvələri qarşıya qoyulan istənilən tapşırığı yerinə yetirməyə daim hazırdır və buna qadirdir. Azərbaycanın güc imkanları, dövlət sərhədlərinin qorunması və təxribatların qarşısının alınması üçün hər zaman "dəmir yumruq" kimi qüvvəsini göstərməyə hazırdır”.
Maral Şahverdili
13:03 04.02.2025
Oxunuş sayı: 10329
