"Rusiyanın səbrinin daşdığı bir zaman olacaq"- ŞƏRH
Yanvarın 14-ü Ermənistan ilə ABŞ arasında strateji tərəfdaşlıq haqqında saziş imzalandı. Vaşinqtonda imzalanan bu sənəd, iki ölkənin siyasi, iqtisadi, hərbi və insan haqqları sahəsində əməkdaşlığı gücləndirməyi hədəfləyir. Lakin sözügedən saziş Ermənistan-Rusiya münasibətləri və Ermənistan-Azərbaycan arasında sülh gündəliyi baxımından bir sıra suallar doğurur. Maraqlıdır, bu saziş, gələcək perspektivlər baxımdan nələri vəd edir?
Mövzu ilə bağlı siyasi şərhçi Kənan Novruzov Crossmedia.az-a açıqlamasında qeyd edib ki, artıq Ermənistan tədricən Rusiyadan uzaqlaşmaq yolunu tutur:
"Ermənistan ilə ABŞ arasında strateji tərəfdaşlıq haqqında saziş imzalanmazdan öncə, Ermənistanın Avropa İttifaqına üzvlük məsələsi gündəmə gəldi. Bu prosesin ardınca belə bir sazişin imzalanması isə Ermənistanın bəyanat səviyyəsindəki mövqeyini əməldə göstərməyə çalışdığını ortaya qoyur. Əlbəttə, bu Rusiya üçün xoş deyil. ABŞ və Avropa İttifaqının da Ermənistan üçün "ürəkləri getmir". Sadəcə olaraq, həm Vaşinqton, həm Brüssel İrəvandan Cənubi Qafqaza müdaxilə etmək üçün bir növ istifadə edirlər. Belə olduğu təqdirdə, bir müddət sonra Rusiyanın mənfi reaksiyasının şahidi ola bilərik. Bu baxımdan, Ermənistan sanki "rus ruletkası" oynayır. Belə ki, Rusiya Ermənistana qarşı heç bir zaman təxribatçı addımlarla cavab verməyib, lakin bu proses davamlı olmayacaq.
Rusiyanın səbrinin daşdığı bir zaman olacaq və bu qarşı tərəf üçün heç də asan başa gəlməyəcək. Bu baxımdan, Ermənistan bu qədər şansını sınamamalıdır. Çünki perspektivə nəzər saldıqda, onun eynilə Ukraynanın taleyini yaşama ehtimalı var. Onsuz da bu gün Ermənistan Rusiya ilə Qərb arasında hərbi poliqona çevrilib və onun vasitəsilə Qərbin regiona müdaxiləsi, Rusiyanın maraqlarına ziddir. Rusiya-Ukrayna müharibəsinin davam etdiyi bir dövrdə Cənubi Qafqazda ikinci cəbhənin açılması da arzuolunan deyil. Buradan isə belə qənaətə gəlmək olar ki, hazırda Rusiya məhz bu perspektivləri nəzərə alaraq, təmkinli davranır. Lakin müəyyən bir müddətən sonra sözügedən müharibə bitəcək və bu zaman artıq Rusiya Ermənistanın hazırki hakimiyyətinə dərs verəcək. N. Paşinyan da bunları nəzərə almalı, gec olmadan daha real addımlar atmalıdır".
Aytac Kərimova
12:12 18.01.2025
Oxunuş sayı: 10698
