İrəvanın Qərbyönümlü siyasəti nəticəsində Ermənistan poliqona çevrilir - AÇIQLAMA

Ermənistan Xarici İşlər Nazirliyi (XİN) Rusiyanın İrəvandakı səfiri Sergey Kopırkini nazirliyə çağırıb. Məlumata görə, narazılıq Ümumrusiya Dövlət Televiziyasının yanvarın 12-də yayımlanan “Vesti nedeli” (“Həftənin xəbərləri”) proqramında səsləndirilən bəyanatlarla bağlıdır.

Məsələ ilə bağlı Crossmedia.az-a açıqlama verən sabiq deputat Elman Məmmədov bildirib ki, Ermənistanın Rusiyaya qarşı sərgilədiyi bu mövqe ölkəni böyük təhlükəyə sürükləyəcək: “Ermənistan deyilən dövlətin bizim tarixi torpaqlarımızda yaranmasının səbəbkarı Rusiyadır. Rusiya bu dövləti yaratmış, müdafiə etmiş və saxlamışdır. Ermənistan Rusiyaya qarşı nankorluq və xəyanətkarlıq siyasəti aparırsa, onlar cəzasız qalmayacaq. Hazırda Ermənistan rəhbərliyi Paşinyanın şəxsində ABŞ, Avropa dövlətləri, Avropa İttifaqı və s. ilə əməkdaşlıq edir, Avropa İttifaqına üzvlük və ABŞ ilə strateji tərəfdaşlıq istiqamətində hərəkət edir. Lakin bir şeyi nəzərə almaq lazımdır ki, onların heç biri bu regiona aid olan dövlətlər və güclər deyillər. Bu regionda söz sahibi və güc sahibi bu gün Azərbaycandır. Ermənistanı qoruyub saxlayan, Ermənistanın nəfəs borusu olan isə Rusiyadır. Rusiya hələ ki, Ermənistanda güc sahibidir və asanlıqla Ermənistanı onlara təhvil verməyəcək. Ermənistan belə hesab edir ki, bu məsələlər asanlıqla həll olunacaq, lakin həll olunmayacaq”.

E. Məmmədov həmçinin qeyd edib ki, Rusiya və İran arasında mövcud olan əməkdaşlıq Ermənistanın Qərbə yönəlmə siyasətinə təsir göstərə bilər. O vurğulayıb ki, nə Rusiya, nə də İran Qərb dövlətlərinin Cənubi Qafqaza gəlməsinə razı deyil. Bu məsələnin qarşısını almaq üçün əllərindən gələni edirlər və edəcəklər: “Bu proseslərdə zərbə altında qalan, hərbi poliqona çevrilən Ermənistan olacaq. Ermənistan rəhbərliyi anlamalıdır ki, onların regiondakı varlığı Türkiyə və Azərbaycanla münasibətləri normallaşdırmaqdan keçir. Əks halda, Ermənistan adlı dövlətin mövcudluğu sual altına düşə bilər”.

Vətəndaş Həmrəyliyi Partiyasının sədri Sabir Rüstəmxanlı isə bildirib ki, Ermənistan Rusiya tərəfindən yaradılmasına baxmayaraq, hazırda bu ölkə Qərbə yaxınlaşmaq siyasəti yürüdür: “ Bütün bunlar Rusiyada hər kəsə bəllidir. Amma baxın, Ermənistanla Rusiya arasındakı ticarət dövriyyəsi hansı səviyyədədir, Rusiyanın Ermənistana hansı münasibəti var. Çünki Rusiyada güclü erməni lobbisi və diasporası mövcuddur. Rusiyanın dövlət rəsmiləri bir şey desələr də, Rusiyanın əli ilə qeyri-rəsmi vasitələrlə Ermənistana kifayət qədər yardım göndərilir və dəstəklənir. Son vaxtlar deyə bilmərəm, amma vaxtilə silah da alıb.

Deməli, mənim müşahidəmə görə Rusiya bir tərəfdən üzdə Ermənistanın Avropayönlü siyasətini pisləsə də, eyni zamanda onun qarşısını almaq üçün ciddi addımlar atmır. Əksinə, Ermənistan Rusiyaya nota verir ki, “hansısa televiziya kanalında bizim siyasətimizi niyə tənqid edirsiniz”. Bu onu göstərir ki, Ermənistan öz ənənəvi həyasızlıq və yaxud qabaqdangəlmişlik siyasətini hətta Rusiyaya qarşı da davam etdirir.

Rusiya isə Ermənistanın Qərbyönümlü siyasətinin tamamilə qarşısını almaq üçün müəyyən qabaqlayıcı addımlar atmaq əvəzinə, Ermənistan qərb yönümlü siyasəti yürütdükcə ona daha sıx sarılır, şirnikləndirməyə çalışır. Ermənistanın Rusiyadan uzaqlaşmaması üçün müəyyən güzəştlər edilir, vədlər verilir və s. Beləliklə, ikibaşlı oyun gedir. Siyasət belədir.

Ancaq bizim mətbuatda yazıldığı kimi, nə Fransa, nə də Amerika bağlanan müqavilələrlə Ermənistanın etdiyi səhvləri düzəldə bilməyəcək. Ermənistanın bu gün tutduğu yol səhvdir. Ermənistan vaxtilə Qarabağa yüksək status fikrindən imtina etdi və nəticədə Qarabağı itirdi. Bu gün Zəngəzur dəhlizinin açılmasına imtina edərsə, fikrimcə, Rusiya Ermənistanın 1923-cü ildə Zəngəzurun, Navahı kəndinin necə verildiyini və digər tarixi sənədləri xatırlada bilər. Bu, gələcəkdə Azərbaycan üçün də müsbət nəticələr doğura bilər. Bu isə Ermənistanın Qafqazdakı taleyinə ciddi zərbə vura bilər.”

Nərgiz Camalzadə