“Ermənistan dənizin ortasında mühərriki dayanmış bir gəmini xatırladır” - POLİTOLOQ
Ermənistan Azərbaycanla əlaqələrin inkişafı üçün bütün məsələlər üzrə həll yolları təklif edib. Bu barədə Ermənistan mətbuatı Baş nazir Nikol Paşinyanın sosial şəbəkələrdəki paylaşımına istinadən məlumat yayıb. “Ermənistanın həyata keçirdiyi balanslaşdırılmış və tarazlaşdırılmış xarici siyasət özünün ilkin hüduduna çatır” - deyə Paşinyan bildirib.
Baş nazir Türkiyə ilə qarşılıqlı anlaşma bazasının formalaşdığını, Rusiya ilə münasibətlərin praktik xarakter daşıdığını və qarşılıqlı faydalı əməkdaşlıq, eləcə də suverenlik prinsipləri əsasında inkişaf etdirildiyini qeyd edib. İranla əməkdaşlığın təbii maraqlara əsaslandığını vurğulayan Paşinyan, bu münasibətlərin bölgədə sabitliyin təminatçısı olduğunu bildirib. Eyni zamanda, qonşu Gürcüstanla əlaqələrin strateji tərəfdaşlıq səviyyəsində inkişaf etdiyini xüsusi vurğulayıb.
Mövzu ilə bağlı Crossmedia.az-a açıqlama verən politoloq Tofiq Abbasov isə Ermənistanın xarici siyasətdə balans yaratmağa yönəlik cəhdlərinin real nəticələr vermədiyini bildirib: “Balanslı və tarazlı siyasət yürütmək üçün ölkə ilk növbədə öz suveren hüquqlarına söykənməli və onlara əsaslanmalıdır. Lakin Ermənistanın faktiki olaraq belə bir imkanı yoxdur. Bu ölkə hazırda digər güclərin təsiri altında olan bir dövlət kimi çıxış edir”.
Politoloq Nikol Paşinyanın bəyanatlarının əsasən PR məqsədli olduğunu və ciddi transformasiyalarla bağlı olmadığını qeyd edib: “Paşinyanın bəyanatlarında yalnız görüntü yaratmağa xidmət edən "sabun köpüyü" effekti var. Ermənistan rəhbərliyi bir sistem qurmağa çalışır ki, guya ölkə bütün əsas istiqamətlərdə suveren siyasət yürütmək iqtidarındadır. Lakin reallıq tamamilə fərqlidir”.
Türkiyə ilə münasibətlərə toxunan Tofiq Abbasov vurğulayıb ki, bu ölkə dəfələrlə dialoqa çağırış edib: “Türkiyənin təklifi dialoqa əsaslansa da, Ermənistan bu təklifdən qaçır. Xaricdə yaşayan ermənilər və türkiyəfob dairələr bu münasibətlərin normallaşmasına mane olmağa çalışırlar”.
Politoloq əlavə edib ki, Ermənistanın Rusiya ilə münasibətlərində riskli addımlar atdığı müşahidə olunur: “Ermənistan ABŞ-ın bölgədə hərbi iştirakını gücləndirmə cəhdləri ilə Rusiyanın maraqlarına zidd addımlar atır. Bu isə Ermənistanın öz gələcəyini təhlükəyə atması deməkdir”.
Tofiq Abbasovun fikrincə, Ermənistan hazırda müstəqil siyasət yürütmək iqtidarında deyil: “Geosiyasi mənzərədə Ermənistan, dənizin ortasında mühərriki dayanmış bir gəmini xatırladır. Külək haradan əsirsə, Ermənistan həmin tərəfə sürüklənir”.
Sonda politoloq Ermənistanın gələcəyi ilə bağlı xəbərdarlıq edib: “Əgər Ermənistan həqiqətən konstruktiv bir inkişaf yolu seçmək istəyirsə, öz davranışlarını yenidən dəyərləndirməli, Rusiya və Türkiyə ilə münasibətlərini normallaşdırmalıdır. Əks halda, bu ölkə subyektivliyini tamamilə itirə bilər və qlobal güclərin oyununda yalnız bir vasitəyə çevrilə bilər”.
Maral Şahverdili
13:21 15.01.2025
Oxunuş sayı: 3443
