Paşinyan istefa verə bilər: Ona təzyiq edilir? - ŞƏRH
Ermənistanın Baş naziri Nikol Paşinyanın yaxın aylarda istefa verəcəyi barədə iddialar gündəmin əsas mövzularından birinə çevrilib. Bu barədə Ermənistan parlamentinin keçmiş deputatı, Paşinyanın sabiq silahdaşı Ovik Ağazaryan açıqlama verib. Ağazaryan bildirib ki, ölkədə növbədənkənar parlament seçkilərinin keçirilməsi planlaşdırılır və bu proses hazırkı siyasi vəziyyətə uyğun olaraq hakimiyyətin maraqlarına cavab verir. Deputatın sözlərinə görə, indiki şəraitdə Paşinyanın yenidən etimad mandatı alması və planlarını həyata keçirməsi üçün daha çox şansı var.
Ağazaryan əlavə edib ki, növbədənkənar seçkilərin keçirilməsi üçün başqa səbəblər də mövcuddur, lakin o, bu məsələnin təfərrüatlarını açıqlamayıb. Ermənistan mətbuatı isə prosesin daha geniş siyasi dəyişikliklərə yol aça biləcəyini vurğulayır.
Mövzu ilə bağlı Crossmedia.az-a açıqlama verən politoloq İlqar Vəlizadə bildirib ki, bu, çox güman müəyyən bir ssenarinin tərkib hissəsidir:
“Yəni, Paşinyan məcburi şəkildə istefa vermir. Heç kim ona təzyiq göstərərək bu addımı atmağa məcbur etmir. Əgər bu ehtimal özlüyündə doğru olsa, bu da yenə müəyyən bir ssenari çərçivəsində həyata keçiriləcək”.
Politoloq qeyd edib ki, hazırda Ermənistanda çox ciddi proseslər gedir:
“Son vaxtlar Ədliyyə naziri bəyanatla çıxış edərək bildirir ki, Ermənistan Konstitusiyasına dəyişikliklər edilməlidir və bu yalnız referendum yolu ilə mümkün ola bilər. Digər tərəfdən, Ermənistan Avropa İttifaqına (Aİ) inteqrasiyaya hazırlaşır. Çox güman ki, bu da Paşinyanın sözlərinə görə referendum vasitəsilə həyata keçirilməlidir. Yəni, cəmiyyət bu addımı dəstəkləməlidir və bunu referendum yolu ilə ifadə etməlidir.Bu referendumdan sonra baş verəcək ciddi siyasi proseslərin nəticəsində Paşinyanın mümkün istefası onu göstərir ki, Ermənistanda növbədənkənar parlament seçkiləri keçirilə bilər. Bu parlament seçkilərinin nəticəsi olaraq həm konstitusiyaya dəyişikliklər başlanıla, həm də Aİ-yə inteqrasiya prosesi sürətlənə bilər. Yəni, indiki hakimiyyət bu proseslərin siyasi legitimliyini təsdiq etmək istəyir”.
Nihat Tahirov
08:32 15.01.2025
Oxunuş sayı: 3094
