NATO müharibəyə qoşulur: Rusiya-Ukrayna müharibəsində ikinci cəbhə!
Fransanın Ukraynaya hərbi dəstəyi yeni mərhələyə qədəm qoyur. Məlumata görə, Fransa hərbçiləri 2026-cı ilin yayından etibarən Ukrayna ərazisində məxfi dəstək missiyası həyata keçirirlər. Bu iddia Parisin müharibədəki rolunun genişlənməsi və Avropanın Ukraynaya hərbi dəstəyinin gələcək istiqamətləri ilə bağlı müzakirələri yenidən gündəmə gətirir.
Fransa hərbçilərinin Ukrayna ərazisində məxfi missiya həyata keçirməsi ilə bağlı məlumatlar Rusiya ilə Qərb arasındakı qarşıdurmanın yeni mərhələyə keçə biləcəyi ehtimallarını artırır. Parisin bu addımı Moskvanın reaksiyasına səbəb olmaqla yanaşı, Fransanın müharibədə birbaşa hədəfə çevrilməsi riskini də gündəmə gətirir. Digər tərəfdən, Fransanın müharibənin başlanmasından xeyli müddət sonra belə bir addım atması Avropanın təhlükəsizlik strategiyasında hansı dəyişikliklərin baş verdiyi sualını ortaya çıxarır.
Mövzu ilə bağlı Crossmedia.az-a açıqlama verən hərbi ekspert Şair Ramaldanov qeyd edib ki, bu məsələdə təəccüblü heç nə yoxdur: “Təkcə Fransa deyil, Ukraynanı dəstəkləyən NATO ölkələrinin əksəriyyəti müəyyən funksiyaları yerinə yetirmək və Ukraynaya kömək göstərmək məqsədilə gizli şəkildə bu ölkənin ərazisində fəaliyyət göstərib və hazırda da göstərirlər. Çünki hazırda Ukraynada istifadə olunan əsas hərbi texnika, silah və avadanlıqların böyük əksəriyyəti ölkə daxilində istehsal olunmur. Bunlar NATO və Ukraynaya dəstək verən digər dövlətlər tərəfindən göndərilən silah, sursat və hərbi avadanlıqlardır. Bu baxımdan düşünürəm ki, müəyyən istiqamətlər üzrə NATO-ya üzv olan və koalisiyada təmsil olunan ölkələrin hərbçilərinin də Ukrayna ərazisində iştirakı mümkündür. Rusiya bununla bağlı dəfələrlə xəbərdarlıq edib. Bildirilib ki, Ukrayna ərazisində olan şəxslərin hərbçi və ya mülki şəxs olmasından asılı olmayaraq, onlar Rusiya üçün legitim hədəf hesab edilə bilərlər. Təbii ki, bu, Fransanın Ukraynada olduğu iddia edilən hərbçilərinə də aiddir.
Məsələnin açıq eskalasiyaya, yaxud Rusiyanın Fransaya qarşı birbaşa addımlar atmasına gəlincə, hesab edirəm ki, hazırkı şəraitdə buna ehtiyac yoxdur. Çünki sözügedən hərbçilər Ukraynaya, əsasən, gizli şəkildə göndərilirlər. Bu səbəbdən onların hüquqi statusu da müəyyən suallar doğurur. Belə şəxslər, ola bilsin ki, əsirlərlə bağlı beynəlxalq konvensiyaların müddəalarının şamil olunduğu hərbi qulluqçular statusunda deyil, muzdlu döyüşçülər kimi fəaliyyət göstərirlər”.

Ekspert qeyd edib ki, digər tərəfdən, Rusiyanın Fransa ilə ayrıca cəbhə açmasına və ya Fransa ərazisinə hücum etməsinə zərurət görmür: “Çünki müharibə Ukrayna ərazisində gedir və Ukraynadan kənar ölkələrin nümayəndələri də orada iştirak edirlər. Onların hərbçi, mülki şəxs və ya muzdlu döyüşçü olmasından asılı olmayaraq, Rusiya onları özünə qarşı qüvvə kimi qiymətləndirə bilər. Məlumata görə, hazırda Ukraynada muzdlu döyüşçülərin sayı 15-20 min nəfərə çatır. Onların cəlb olunması və fəaliyyətinin təşkilində də Ukraynanı dəstəkləyən koalisiya ölkələrinin imkanlarından istifadə edildiyi bildirilir. Belə bir vəziyyətdə Rusiyanın ayrıca cəbhə açmasına və ya Fransaya qarşı birbaşa hərbi əməliyyatlara başlamasına ehtiyac yoxdur. Çünki Rusiya Ukrayna ərazisində hərbi əməliyyatlarını davam etdirir və demək olar ki, ölkənin müxtəlif nöqtələrinə zərbələr endirir. Həmin ərazilərdə Fransa hərbçilərinin, Ukrayna ordusunun nümayəndələrinin və ya başqa ölkələrin hərbçilərinin, eləcə də muzdlu döyüşçülərin olması Rusiyanın hərbi hədəflərini dəyişmir. Hazırda Ukrayna, faktiki olaraq, Avropa ölkələrinin və NATO üzvlərinin təqdim etdiyi silah-sursat və hərbi texnika ilə müharibə aparır. Bu halda Rusiyanın həmin ölkələrin hər biri ilə ayrıca cəbhə açacağını gözləmək düzgün olmaz. Müharibə Ukrayna ərazisində gedir və hərbi proseslər də əsasən həmin ərazidə davam edəcək. Düşünürəm ki, Rusiyanın ikinci cəbhə açması, yaxud hansısa ölkəyə qarşı birbaşa cavab addımları atması yalnız Fransa öz ordusunu açıq şəkildə Ukraynaya yeridərək Rusiya ilə müharibədə birbaşa iştirak edəcəyi təqdirdə gündəmə gələ bilər. Hazırda isə belə bir vəziyyət mövcud deyil. Ona görə də hesab edirəm ki, Fransa bu istiqamətdə hansı addımları atırsa, onları daha çox gizli şəkildə həyata keçirir. Bu fəaliyyət açıq və rəsmi hərbi iştirak statusu daşımadığı üçün də məsələnin hüquqi və siyasi tərəfləri fərqli qiymətləndirilə bilər. Nəticə etibarilə, Rusiya Ukrayna ərazisində hərbi əməliyyatlarını davam etdirəcək və Ukraynanı dəstəkləyən qüvvələrə, eləcə də həmin ərazidə fəaliyyət göstərən şəxslərə qarşı addımlarını məhz Ukrayna daxilində atacaq. Bunun üçün ayrıca başqa bir ölkəyə qarşı cəbhə açmağa ehtiyac görmürəm”.
Ayhan
10:00 18.11.2026
Oxunuş sayı: 104