Xarici xəbərlər

İngiltərədə milli muzeylərə turistlər üçün ödəniş tətbiq olunmayacaq

İngiltərənin milli muzeylərinə xaricdən gələn turistlər də bundan sonra ödənişsiz daxil ola biləcəklər.

Crossmedia.az xəbər verir ki, BBC bu barədə məlumat yayıb.

Qərar hökumət, muzeylər, turizm sektoru və yerli rəhbərliklər arasında aylarla davam edən müzakirələrdən sonra qəbul edilib. Müzakirələr zamanı xarici turistlər üçün giriş haqqının tətbiqinin muzeylərin maliyyə vəziyyətini yaxşılaşdırıb-yaxşılaşdırmayacağı araşdırılıb.

Mart ayında hökumət maliyyə təzyiqlərini azaltmaq məqsədilə milli muzeylərə beynəlxalq ziyarətçilər üçün ödəniş tətbiq edilməsini nəzərdən keçirdiyini açıqlamışdı.

Lakin Rəqəmsal, Mədəniyyət, Media və İdman Departamenti (DCMS) bildirib ki, belə bir addım yerli ziyarətçilərin sayının azalmasına səbəb ola bilər. Həmçinin ödəniş tətbiqindən əldə olunacaq faydanın bütün muzeylər üzrə eyni olmayacağı qeyd edilib.

Böyük Britaniyanın 15 milli muzeyi, o cümlədən Londonda yerləşən 12 muzey 2001-ci ildən etibarən hamı üçün pulsuz fəaliyyət göstərir.

Ötən il keçmiş Leyboristlər hökuməti naziri baronessa Marqaret Hocun hazırladığı hesabatda isə xarici turistlər üçün giriş haqqının tətbiqinin Böyük Britaniyanı Yeni Zelandiya və Sinqapur kimi ölkələrin təcrübəsinə yaxınlaşdıracağı bildirilmişdi.

DCMS çərşənbə axşamı təsdiqləyib ki, milli muzeylərə giriş hamı üçün pulsuz olaraq qalacaq.

🖨 Çap et

01:54 30.09.2026

Oxunuş sayı: 37