Ronald Lauder siyasətdən geri çəkilir: Respublikaçılara ianələri dayandırıb
Nyu-Yorkda respublikaçıların əsas maliyyə dəstəkçilərindən biri olan milyarder Ronald Lauder siyasi fəaliyyətini kəskin şəkildə azaldıb və bu il ştatdakı respublikaçı namizədlərə hələlik heç bir ianə etməyib.
Crossmedia.az xəbər verir ki, “The New York Times” (NYT) bu barədə məlumat yayıb.
82 yaşlı Lauder Estee Lauder kosmetika imperiyasının varisi və tanınmış xeyriyyəçidir. O, onilliklər ərzində mühafizəkar təşəbbüsləri fəal şəkildə maliyyələşdirib.
Lauder Nyu-Yorkda vəzifə müddətinə məhdudiyyətlərin tətbiqi ilə bağlı kampaniyanı şəxsən dəstəkləyib, ştatın seçki dairələri xəritəsinə qarşı qaldırılan məhkəmə iddiasının maliyyələşdirilməsində iştirak edib. 2022-ci ildə isə respublikaçıların Nümayəndələr Palatasında çoxluq əldə etməsinə kömək edən kampaniyalara təxminən 13 milyon dollar yönəldib.
Hazırda onun illər ərzində respublikaçı namizədləri və təşəbbüsləri dəstəkləyən super-PAC siyasi komitəsi fəaliyyət göstərmir. Bundan başqa, Lauder onilliklər ərzində onunla çalışan bir sıra məsləhətçiləri, reklam mütəxəssislərini və digər əməkdaşları işdən çıxarıb.
Lauderin bu qərarı verməsinin səbəbləri tam aydın deyil. Vəziyyətlə tanış olan üç nəfər bildirib ki, Lauder yetkin övladlarının onun siyasət, incəsənət və xeyriyyə fəaliyyətlərinə böyük məbləğlər xərcləməsini azaltmağa çalışdığını onlara deyib.
Həmin şəxslər ailə şirkəti Estee Lauder-də Lauderə məxsus səhmlərin dəyərinin də kəskin azaldığını bildiriblər. Şirkətin səhmləri 2021-ci ildəki rekord göstərici ilə müqayisədə təxminən 77 faiz ucuzlaşıb. Bu isə onun şirkətdəki payının dəyərini ən azı 1,2 milyard dollar azaldıb.
Bununla belə, Lauder ailəsinə yaxın şəxs “NYT”-yə bildirib ki, siyasi xərclərin azaldılması maliyyə çatışmazlığı ilə bağlı deyil. Onun sözlərinə görə, Lauder və övladları fəaliyyətinin strukturunu sadələşdirmək barədə razılığa gəliblər. Buraya səfərlərin, əməkdaşların sayının və ictimai çıxışların azaldılması daxildir.
Məqsəd Lauderin həyatının son illərində diqqətini irsini qoruyub saxlamağa yönəlmiş incəsənət və xeyriyyə layihələrinə cəmləməsidir.
Lauder özü nəşrin maliyyə vəziyyəti və qəbul etdiyi qərarların səbəbləri ilə bağlı ətraflı suallarını cavablandırmayıb. Yazılı açıqlamasında o, uzun illər ərzində siyasi ianələr və xeyriyyəçilik vasitəsilə Nyu-Yorkun inkişafına töhfə verdiyini və şəhərin inkişafı üçün vaxtını və resurslarını ayırmaqda davam edəcəyini bildirib.
Respublikaçılar hələ də milyarderin hazırkı seçki kampaniyasına qoşula biləcəyinə ümid edirlər. Lakin Nyu-York Mühafizəkarlar Partiyasının sədri Cerard Kassar bildirib ki, Lauderin keçmiş uzunmüddətli köməkçisindən aldığı məlumata əsasən, milyarder və ailəsi onun bundan sonra siyasətlə əvvəlki qədər fəal məşğul olmayacağına qərar verib.
“Onu Nyu-Yorkda maliyyə baxımından kimsə əvəz edə bilərmi? Sadə cavab xeyrdir”, - Kassar deyib.
Siyasi fəaliyyətini azaltmasına baxmayaraq, Lauder dünyanın ən varlı şəxslərindən biri olaraq qalır. O, dünyanın ən böyük şəxsi incəsənət kolleksiyalarından birinə, Gulfstream markalı şəxsi təyyarəyə, Palm-Biç və Hempton bölgələrində daşınmaz əmlaka sahibdir.
Forbes-in qiymətləndirməsinə görə, Lauderin və onun iki yetkin qızının hər birinin sərvəti milyardlarla dollarla ölçülür.
Eyni zamanda, Lauder siyasətdən kənarda da mühüm nəticələr doğura biləcək addımlar atır. O, Estee Lauder şirkətinin direktorlar şurasındakı yerindən imtina edib.
Bundan əlavə, may ayında onun Nyu-Yorkda yaratdığı Neue Galerie muzeyinin Metropolitan İncəsənət Muzeyi ilə birləşdirilməsi barədə razılaşma elan edilib.
15:09 09.08.2026
Oxunuş sayı: 60
