Xarici xəbərlər

İndoneziyada 116 milyon dollarlıq ketamin ələ keçirildi

İndoneziya hakimiyyəti bir neçə ay ərzində izlənilən xarici yük gəmisindən ümumi dəyəri təxminən 116 milyon dollar olan 1,3 ton ketamin müsadirə edib.

Crossmedia.az xəbər verir ki, bu barədə İndoneziyanın Narkotiklərlə Mübarizə üzrə Milli Agentliyinin rəhbəri Suyudi Ario Seto məlumat verib.

Onun sözlərinə görə, hakimiyyət orqanları fevral ayında Tanzaniya bayrağı altında üzən “MV King Sun” gəmisinin Taylanddan İndoneziya istiqamətində hərəkət etdiyini və gəmidə şübhəli yük olduğunu müəyyən edib. Bundan sonra gəmi bir neçə ay ərzində nəzarətdə saxlanılıb.

Cümə axşamı İndoneziya hərbi gəmisi “MV King Sun”u ölkənin ərazi sularına daxil olarkən saxlayıb. Avqustun 7-də gəmidə aparılan birgə axtarış zamanı 65 kisə aşkarlanıb. Aparılan analiz nəticəsində kisələrdə ketamin olduğu müəyyən edilib.

Müsadirə olunan narkotik vasitənin ümumi dəyəri təxminən 2,07 trilyon İndoneziya rupisi və ya 116,2 milyon dollar qiymətləndirilir. Hazırda gəmidə əlavə narkotik partiyasının olub-olmadığını müəyyənləşdirmək üçün axtarışlar davam etdirilir.

Gəmi Sinqapur yaxınlığında yerləşən Riau adaları əyaləti ərazisində saxlanılıb. Gəmidə 7-si Myanma, 1-i isə Tayvan vətəndaşı olmaqla, ümumilikdə 8 ekipaj üzvü olub. Onların hamısı saxlanılıb.

İstintaq zamanı narkotik yükünün mənşəyi, təyinat limanı, eləcə də onun göndəricisi və alıcısının kimliyi müəyyənləşdirilir.

Ketamin əsasən sürətli təsir göstərən anestezik vasitə kimi istifadə olunur. Bununla yanaşı, maddədən qanunsuz narkotik kimi də geniş istifadə edilir. İndoneziyada ketaminin dövriyyəsinə ciddi nəzarət olunur.

Qeyd edək ki, ötən ay İndoneziya hakimiyyəti Taylanddan ölkəyə 3,37 ton marixuana qaçaqmalçılığı cəhdinin qarşısını alıb və 12 nəfəri saxlayıb. 2021-ci ildə isə ölkə polisi Əfqanıstandan 2,5 ton metamfetaminin gətirilməsi ilə bağlı narkotik şəbəkəsini ifşa edib və 17 şübhəli şəxsi həbs edib.

İndoneziyada narkotiklərlə bağlı dünyanın ən sərt qanunlarından biri qüvvədədir. Narkotik vasitələrin qanunsuz dövriyyəsi ilə məşğul olan şəxslər ölüm cəzasına məhkum edilə bilər. Bununla belə, ölkədə bir neçə ildir ölüm hökmlərinin icrasına moratorium tətbiq olunur.

🖨 Çap et

15:45 09.08.2026

Oxunuş sayı: 52