Ermənistan Azərbaycanın əyalətinə çevrilə bilər - Karapetyandan qalmaqallı açıqlama
Ermənistanda siyasi gərginlik fonunda baş nazir Nikol Paşinyana qarşı sərt ittihamlar səsləndirilməyə davam edir.
Müxalif düşərgənin əsas simalarından biri hesab olunan “Güclü Ermənistan” partiyasının baş nazirliyə namizədi Samvel Karapetyan Paşinyanın yenidən hakimiyyətə gələcəyi təqdirdə ölkənin ciddi geosiyasi təhlükə ilə üzləşəcəyini iddia edib.
Karapetyan bildirib ki, Paşinyanın siyasəti Ermənistanın dövlət maraqlarını zəiflədərək ölkəni xarici təsirlərə daha açıq vəziyyətə gətirir.
O, hazırkı baş naziri “Azərbaycanın qubernatoru” adlandıraraq, yenidən seçiləcəyi halda Ermənistanın Azərbaycanın “əyalətinə çevriləcəyi” barədə qalmaqallı açıqlama verib.
Məsələ ilə bağlı politoloq Əhəd Məmmədli Crossmedia.az-la öz fikirlərini bölüşüb:
"Karapetyan əsasən müxalif mövqedən çıxış edərək iddia edir ki, Paşinyanın zəifləməsi Ermənistanın mövqelərinin Azərbaycan və Türkiyənin xeyrinə dəyişməsinə gətirib çıxarır və bu proses davam edərsə, Ermənistanın dövlət kimi gələcəyi təhlükə altına düşə bilər. Bu tip bəyanatlar bəzən ictimai rəyi təsirləndirmək və erməni cəmiyyətində müəyyən siyasi fəallığı artırmaq məqsədi daşıyır.
Rusiya faktoruna gəldikdə isə, qeyd etmək lazımdır ki, müasir Ermənistan 1990-cı illərin əvvəlindəki zəif və tam asılı dövlət deyil. Buna görə də, Rusiya tərəfindən birbaşa hərbi müdaxilə və ya açıq seçki prosesinə təsir imkanları əvvəlki dövrlərlə müqayisədə daha məhduddur.
Lakin Rusiya siyasi proseslərə dolayı yolla – xüsusilə informasiya, təbliğat və müxtəlif siyasi qüvvələr vasitəsilə təsir göstərməyə çalışa bilər. Bu baxımdan Karapetyan və Koçaryan kimi müxalif fiqurların rolu da diqqət çəkir.
Eyni zamanda, İkinci Qarabağ müharibəsindən sonra Ermənistan cəmiyyətində Rusiyaya münasibət nəzərəçarpacaq dərəcədə dəyişib.
Bir çox ermənilər hesab edir ki, Rusiya gözlənilən səviyyədə dəstək göstərməyib. Xüsusilə, 2020-ci il müharibəsi və 2022-ci ildə sərhəd gərginlikləri fonunda Ermənistan tərəfi KTMT-nin mövqeyindən narazılıq ifadə edib. KTMT-nin həmin dövrdə sərhədlərin dəqiq müəyyən olunmamasını əsas gətirməsi Ermənistan ictimaiyyətində məyusluq yaradıb.
Bütün bu amillər nəticəsində ölkə daxilində siyasi qütbləşmə güclənib. Keçmiş “Qarabağ klanı” kimi tanınan siyasi qüvvələr uzun illər hakimiyyətdə olmuş və sonradan korrupsiya və idarəetmə problemləri ilə bağlı ciddi tənqidlərə məruz qalmışdır.
Bu da onların cəmiyyət daxilində nüfuzunun azalmasına səbəb olub. Paşinyana dəstək verənlərin bir hissəsi onun siyasətini tam dəstəklədiyi üçün deyil, alternativ kimi gördükləri qüvvələrə qarşı mövqe kimi ona üstünlük verirlər.
Azərbaycan baxımından isə Ermənistan daxilindəki siyasi sabitlik və ya qeyri-sabitlik məsələsinə dair müxtəlif yanaşmalar mövcuddur.
Bəzi analitiklər hesab edirlər ki, regionda sabit və proqnozlaşdırıla bilən Ermənistan daha uzunmüddətli diplomatik proseslər üçün əlverişlidir. Digər yanaşmalar isə regiondakı balansın dəyişkənliyini fərqli şəkildə qiymətləndirir. Lakin ümumilikdə bu mövzu çoxşaxəli və mürəkkəb geosiyasi reallıqlarla bağlıdır.
Paşinyan hökumətinin Rusiya ilə iqtisadi münasibətləri isə davam edir. Ermənistan-Rusiya ticarət əlaqələri hələ də mühüm rol oynayır və tərəflər arasında iqtisadi asılılıq tam aradan qalxmayıb. Bu baxımdan Ermənistan eyni zamanda müxtəlif tərəflərlə balanslı siyasət aparmağa çalışır.
Nəticə etibarilə, Ermənistanın daxili siyasi vəziyyəti, regional güclərlə münasibətləri və seçki prosesləri çox mürəkkəb və çoxqatlı bir sistem təşkil edir. Mövcud dinamika yaxın gələcəkdə də regionda siyasi proseslərin dəyişkən qalacağını göstərir.
Bu siyasətin sonu yaxşı olmayacaq. Bir neçə stolda oturmaq əvəzinə, bir stolda oturmaq daha məqsədəuyğundur. Yəni bir neçə güc mərkəzi arasında balans yaratmaqdan daha çox, bir gücə - məsələn, Rusiyaya - söykənmək daha təhlükəsiz sayılır.
Revanşistlər məhz bu fikri çatdırmağa çalışırlar. Paşinyan tərəfi isə bildirir ki, əgər vəziyyət sabit idisə, biz niyə Qarabağı itirdik və s. Bir sözlə, bütün bu məsələlərin nə ilə nəticələnəcəyini zaman göstərəcək".
Elmir Heydərli
17:28 11.05.2026
Oxunuş sayı: 65
