Azərbaycan-Türkiyə memorandumu - Silah və texnologiyada birgə istehsal dövrü başlayır
Azərbaycan və Türkiyə arasında müdafiə sənayesi sahəsində əməkdaşlıq münasibətləri yeni mərhələyə qədəm qoyur. İmzalanmış Anlaşma Memorandumunun icrasına başlanılması iki qardaş ölkə arasında hərbi-texniki əməkdaşlığın daha da dərinləşdirilməsi baxımından mühüm əhəmiyyət kəsb edir.
Bu çərçivədə keçirilən görüşlərdə tərəflər əməkdaşlığın hüquqi və institusional əsaslarının möhkəmləndirilməsi, eləcə də konkret layihələrin həyata keçirilməsi istiqamətində fikir mübadiləsi aparıblar.
Eyni zamanda, müvafiq icra müqaviləsinin imzalanması qarşılıqlı fəaliyyətin praktiki müstəvidə genişləndirilməsinə və müdafiə sənayesi sahəsində yeni imkanların formalaşmasına zəmin yaradır.
Məsələ ilə bağlı hərbi ekspert Rövşən Məhərrəmov Crossmedia.az-la öz fikirlərini bölüşüb:
"Bu, olduqca vacib bir məsələdir. Məlumdur ki, Azərbaycan Cənubi Qafqaz regionunda yerləşən bir dövlətdir və bu region tarixən daim gərginliklə müşayiət olunmuşdur. Xüsusilə qeyd etmək lazımdır ki, Azərbaycan ilə Ermənistan arasında bu günə qədər sülh müqaviləsi imzalanmamışdır.
Eyni zamanda, qonşu ölkələrdə baş verən proseslər də göstərir ki, Azərbaycan öz silahlı qüvvələrini daha da gücləndirməli, inkişaf etdirməli və müasir silahlarla təmin etməlidir.
Bu istiqamətdə ən mühüm məsələlərdən biri də hərbi sənayenin inkişafıdır. Qırx dörd günlük Vətən müharibəsi bir daha sübut etdi ki, Azərbaycan Ordusu yalnız xarici mənbələrə deyil, eyni zamanda öz hərbi sənayesinə də güvənməli və onu inkişaf etdirməlidir.
Məqsəd ondan ibarətdir ki, ölkə mümkün qədər öz ehtiyaclarını daxili istehsal hesabına ödəsin, silah-sursat, müasir texnologiyalar və pilotsuz uçuş aparatları kimi məhsulları özü istehsal etsin.
Bu baxımdan, Azərbaycan ilə Türkiyə arasında imzalanmış Şuşa Bəyannaməsi xüsusi əhəmiyyət kəsb edir. Bu sənəd iki qardaş dövlət arasında strateji əməkdaşlığın əsasını təşkil edir və faktiki olaraq Azərbaycanın təhlükəsizlik təminatlarından biri kimi çıxış edir.
Eyni zamanda, hərbi-sənaye sahəsində imzalanmış anlaşma memorandumları da bu əməkdaşlığın daha da dərinləşdirilməsinə xidmət edir.
Türkiyə son illərdə hərbi sənayesini sürətlə inkişaf etdirərək dünya miqyasında rəqabət qabiliyyətli ölkələrdən birinə çevrilmişdir. Azərbaycan da bu sahədə mühüm addımlar atmış, müxtəlif növ silah və hərbi texnika istehsal etməyə başlamışdır.
Xüsusilə, pilotsuz uçuş aparatlarının Vətən müharibəsində göstərdiyi yüksək effektivlik bu istiqamətin nə qədər vacib olduğunu bir daha təsdiqlədi.
İki ölkə arasında imzalanmış memorandumun qüvvəyə minməsi o deməkdir ki, tərəflər hərbi-sənaye sahəsində daha sıx əməkdaşlıq edəcək, yeni və müasir silahların birgə istehsalına başlanacaqdır. Bu isə həm Azərbaycan, həm də Türkiyə üçün böyük strateji əhəmiyyət daşıyır.
Eyni zamanda, Azərbaycanın istehsal etdiyi hərbi məhsulların beynəlxalq bazarlara çıxarılması istiqamətində də mühüm addımlar atılmışdır. Müxtəlif beynəlxalq sərgilərdə iştirak edilməsi, məhsulların nümayiş etdirilməsi və onların keyfiyyətinin tanıdılması bu sahədə müsbət nəticələr verməkdədir.
Bu gün dünyada baş verən geosiyasi proseslər bir daha göstərir ki, hər bir dövlət öz təhlükəsizliyini təmin etmək üçün xarici asılılığı minimuma endirməlidir.
Bu baxımdan, Azərbaycan ilə Türkiyə arasında hərbi-sənaye əməkdaşlığına dair memorandumun imzalanması və icrası son dərəcə vacibdir.
Hesab edirəm ki, gələcəkdə bu əməkdaşlıq çərçivəsində birgə istehsal olunan silahlar həm ölkələrimizin ordularının ehtiyaclarını tam şəkildə ödəyəcək, həm də dünya bazarında rəqabətqabiliyyətli məhsullar kimi öz yerini tutacaqdır. Bu isə nəticə etibarilə hər iki dövlətin müdafiə qabiliyyətinin güclənməsinə və strateji müstəqilliyinin təmin olunmasına xidmət edəcəkdir".
Elmir Heydərli
16:13 06.04.2026
Oxunuş sayı: 686
