Avropa Rusiyaya şərt qoydu: Əvvəlcə müharibə dayandırılmalıdır
Avropa ölkələri Rusiyanın qitənin təhlükəsizlik arxitekturası ilə bağlı tələblərini müzakirə etməzdən əvvəl Ukraynaya qarşı müharibəni dayandırmasını tələb edir. Bu mövqe ABŞ ilə Avropa arasında fikir ayrılıqlarını dərinləşdirə bilər.
Crossmedia.az xəbər verir ki, bu barədə “Bloomberg” nəşri məlumat yayıb.
Nəşrin mənbələrinin bildirdiyinə görə, Avropa rəsmiləri Rusiya Prezidenti Vladimir Putinin müharibədən əvvəl irəli sürdüyü, NATO-nun Şərqi Avropadakı mövcudluğunun azaldılmasını nəzərdə tutan tələbləri qəbuledilməz hesab edirlər.
Avropa rəsmilərinin fikrincə, mövcud təhlükəsizlik sisteminin əsas məqsədlərindən biri Rusiyanın Avropaya mümkün hücumunun qarşısını almaqdır. Buna görə də Moskva Ukraynaya qarşı müharibəni davam etdirdiyi və mövcud razılaşmaları pozduğu müddətdə təhlükəsizlik məsələlərinin müzakirəsi məqsədəuyğun sayılmır.
Avropa ölkələri hesab edirlər ki, əvvəlcə atəşkəs əldə olunmalı, müharibədən sonrakı təhlükəsizliklə bağlı istənilən razılaşma isə bütün Avropa dövlətlərinin razılığını almalıdır.
ABŞ Prezidenti Donald Tramp administrasiyası isə Avropanın təhlükəsizlik arxitekturası məsələsinin Rusiya ilə danışıqlarda digər mövzularla paralel müzakirə edilməsini istəyir.
ABŞ prezidentinin kürəkəni və xüsusi nümayəndəsi Cared Kuşner bu istiqamətdə beş əsas məqsəd müəyyənləşdirib. Bunlara təhlükəsizlik üzrə daimi məsləhətləşmələr, böhran vəziyyətlərində etibarlı kommunikasiya kanalları, hərbi şəffaflığın artırılması, eskalasiya risklərinin azaldılması üçün qarşılıqlı addımlar və Avropada uzunmüddətli sabitlik çərçivəsinin yaradılması daxildir.
Ağ Ev isə Avropanın suverenliyinin qorunmasının və NATO-nun kollektiv müdafiədə mərkəzi rolunun əhəmiyyətini qəbul etdiyini bildirib.
Vaşinqtonun yanaşması Avropanın bir sıra paytaxtlarında narahatlıq yaradıb. Polşanın xarici işlər naziri Radoslav Sikorski Avropanın sülhə Vladimir Putindən daha çox can atmamalı olduğunu deyib.
“Görünür, bəzən təcavüzkardan daha çox qurbana təzyiq göstərilir”, – deyə o bildirib.
ABŞ Konqresindəki demokratlar da təklifə etiraz ediblər. Senator Maykl Bennet isə “Avropanın təhlükəsizlik arxitekturası artıq mövcuddur. Onun adı NATO-dur”, – deyə yazıb.
Ərazi məsələlərinin müzakirəsi hələlik təxirə salınıb. Mənbələrin məlumatına görə, Putin Donbasın bütün ərazisinə nəzarət tələbindən geri çəkilmir.
Avropalı rəsmilər hesab edirlər ki, Rusiya Prezidenti yaxın aylarda ciddi danışıqlara hazırlaşmır və Ukrayna əhalisinin mənəvi müqavimətini qırmaq məqsədilə genişmiqyaslı zərbələrə üstünlük verir.
Bu arada Kiyev Əbu-Dabidə keçiriləcək danışıqlara hazırlaşır. Ukrayna ABŞ və Rusiya ilə üçtərəfli görüşdə iştirak edəcək nümayəndə heyətinin tərkibini açıqlayıb. Heyətə Prezident Ofisinin rəhbəri Kirill Budanov da daxil edilib. Əvvəlcə onun nümayəndə heyətinə rəhbərlik edəcəyi bildirilsə də, sonradan Prezidentin kommunikasiya məsələləri üzrə müşaviri Dmitri Litvin Budanovun danışıqlarda iştirakçılardan biri olacağını dəqiqləşdirib.
Noyabrın 10-11-də keçirilməsi planlaşdırılan görüşdə Ukrayna üçün əsas müzakirə mövzusu təhlükəsizlik təminatları olacaq. Prezident Volodimir Zelenski də bu məsələnin Əbu-Dabidə müzakirə edilməsinin vacibliyini vurğulayıb.
08:00 09.11.2026
Oxunuş sayı: 87
