Azərbaycan–Qırğızıstan münasibətlərində yeni mərhələ: Strateji tərəfdaşlıq və Orta Dəhlizin yaratdığı imkanlar
Azərbaycan ilə Qırğızıstan arasında münasibətlər son illərdə sürətlə inkişaf edərək strateji tərəfdaşlıq səviyyəsinə yüksəlib. İki ölkə arasında siyasi dialoqun intensivləşməsi, qarşılıqlı səfərlər, iqtisadi-ticarət əlaqələrinin genişlənməsi, eləcə də mədəni və humanitar sahələrdə əməkdaşlıq münasibətlərin yeni mərhələyə keçdiyini göstərir. Türk Dövlətləri Təşkilatı (TDT) çərçivəsində də Bakı və Bişkek arasında əməkdaşlığın gücləndirilməsi xüsusi əhəmiyyət daşıyır. Xüsusilə investisiya imkanları, nəqliyyat-logistika layihələri və Orta Dəhliz üzrə əməkdaşlıq iki ölkə münasibətlərinin gələcək perspektivlərini daha da artırır. Bəs bu gün Bakı və Bişkek münasibətlərini necə səciyyələndirmək olar? İki dövlət arasında siyasi-iqtisadi əlaqələrin inkişafı tərəflərə hansı imkanları və perspektivləri vəd edir?
Mövzu ilə bağlı professor, siyasi elmlər doktoru Sabir Məmmədli Crossmedia.az-a açıqlamasında qeyd edib ki, Azərbaycanın Orta Asiya türk respublikaları ilə əlaqələri kifayət qədər perspektivlidir: “Hazırda bu münasibətlər TDT çərçivəsində də inkişaf etməkdədir. Məsələ burasındadır ki, Azərbaycan artıq Qazaxıstan və Özbəkistanla ən yüksək səviyyədə əməkdaşlıq sazişləri imzalayıb. Bu sahələri əhatə edən investisiya yatırımları, eləcə də mədəniyyət, ticarət və digər istiqamətlər üzrə əlaqələr güclənir. Eyni zamanda, Türkmənistan da TDT fəaliyyətinə fəal şəkildə qoşulur. Azərbaycanla Türkmənistan arasında da ikitərəfli sazişlər mövcuddur və bu istiqamətdə əməkdaşlıq inkişaf edir. Qırğızıstanla əlaqələrimiz artıq kifayət qədər intensiv inkişaf mərhələsindədir. Belə ki, həm Qırğızıstanda, həm də Azərbaycanda qarşılıqlı olaraq mədəniyyət günləri keçirilib. Bir müddət bundan əvvəl Manas dastanının yubileyi Azərbaycanda qeyd olunmuş, bununla əlaqədar konfranslar keçirilmişdi. Eyni zamanda, uzun müddətdir media əməkdaşları və jurnalistlər arasında qarşılıqlı əlaqələrin inkişafına töhfə verə biləcək tədbirlər, seminarlar və konfranslar təşkil olunur. Qırğızıstanın jurnalistləri və media nümayəndələri Azərbaycana səfər ediblər. Azərbaycan jurnalistləri də Qırğızıstana səfərlər həyata keçiriblər”.
Professor qeyd edib ki, bu əlaqələr kifayət qədər uğurla davam edir: “Hazırda Azərbaycan çalışır ki, Qırğızıstanla daha sıx əlaqələr qursun və əməkdaşlıq çərçivəsini genişləndirsin. Belə ki, Qırğızıstanda investisiya yatırmaq üçün kifayət qədər imkanlar mövcuddur. Eyni zamanda, Qırğızıstanın özü də bu əməkdaşlıqda maraqlıdır. Çünki Qırğızıstan təbii ehtiyatlarla kifayət qədər zəngin olan ölkədir. Bu mənada Azərbaycan istər TDT çərçivəsində, yəni çoxtərəfli sazişlər əsasında, istərsə də ikitərəfli müqavilələr və sazişlər vasitəsilə əməkdaşlığı sürətlə inkişaf etdirir. Ümumiyyətlə, türk dövlətləri arasında istər qeyd etdiyim kimi, ikitərəfli müqavilələr və sazişlər, istərsə də çoxtərəfli əlaqələr əsasında qurulan əməkdaşlıq həm regionumuz, həm də mövcud münasibətlərin gücləndirilməsi baxımından çox vacib və əhəmiyyətlidir. Çünki Qırğızıstan da görür ki, Qazaxıstan və Özbəkistan Azərbaycanla sıx əməkdaşlıq istiqamətini seçib. Bu baxımdan, Qırğızıstan da Azərbaycanla strateji əməkdaşlıq əlaqələrini gücləndirməyə çalışacaq. Belə ki, Qırğızıstanın Çinlə də kifayət qədər yaxın əlaqələri mövcuddur”.
S.Məmmədli əlavə edib ki, Orta Dəhliz marşrutu Qırğızıstan, Özbəkistan, Qazaxıstan və Azərbaycan üzərindən keçir: “Bu istiqamətdə dəmir yolu infrastrukturu da inkişaf etdirilir. Nəticə etibarilə, yükdaşımalar Qırğızıstan, Özbəkistan və Azərbaycan üzərindən Avropaya və Türkiyəyə istiqamətlənir. Buna görə də bu əməkdaşlıq bütün tərəflər üçün maraqlıdır və dövlətlər münasibətlərin daha yüksək səviyyəyə çatmasında maraqlıdırlar”.
Ayhan
12:00 03.11.2026
Oxunuş sayı: 66
