Coders Azərbaycan və İRİB insan resurslarında süni intellektin tətbiqi üzrə əməkdaşlıq edəcək
Coders Azerbaijan və “İnsan Resurslarının İdarə Olunması” İctimai Birliyi (İRİB) insan resurslarının idarə edilməsində müasir texnologiyaların və süni intellektin tətbiqi istiqamətində əməkdaşlıq imkanlarını müəyyənləşdirib.
Crossmedia.az xəbər verir ki, əməkdaşlığın əsas məqsədi HR mütəxəssislərinin rəqəmsal bacarıqlarını inkişaf etdirmək və müasir informasiya texnologiyalarının insan resurslarının idarə edilməsi proseslərinə inteqrasiyasını təşviq etməkdir.
Əməkdaşlıq çərçivəsində süni intellekt alətlərinin HR proseslərində tətbiqi, işə qəbulun rəqəmsallaşdırılması, namizədlərin ilkin qiymətləndirilməsi, işçi performansının təhlili, həmçinin təlim və inkişaf proseslərinin optimallaşdırılması üzrə bilik və təcrübə mübadiləsi nəzərdə tutulur.
Bununla yanaşı, rəqəmsal savadlılığın artırılması, süni intellekt və yeni texnologiyalar üzrə maarifləndirici tədbirlərin təşkili, ixtisaslaşmış təlim proqramlarının hazırlanması, seminar və praktiki məşğələlərin keçirilməsi imkanları dəyərləndiriləcək.
Təşəbbüs HR mütəxəssislərinin əmək bazarının dəyişən tələblərinə uyğunlaşmasına, peşəkar kompetensiyalarının inkişafına və təşkilatlarda innovativ idarəetmə yanaşmalarının tətbiqinə dəstək məqsədi daşıyır.
Tərəflər gələcəkdə əməkdaşlığın konkret layihələr, birgə təlim proqramları və peşəkar inkişaf təşəbbüsləri vasitəsilə genişləndirilməsi imkanlarını da nəzərdən keçirəcəklər.
11:05 03.11.2026
Oxunuş sayı: 51
