Xarici xəbərlər

İran ABŞ ilə razılaşmanın hələ uzaq olduğunu açıqlayıb

İran və ABŞ arasında müharibənin dayandırılmasına dair razılaşmanın əldə olunması hələ də uzaq perspektiv olaraq qalır. Tehran Vaşinqtonun irəli sürdüyü tələbləri həddindən artıq hesab edərək qəbul etmədiyini bildirib.

Crossmedia.az xəbər verir ki, “Reuters” agentliyi yüksəkvəzifəli İran rəsmisinə istinadən bu barədə məlumat yayıb.

Adının açıqlanmasını istəməyən rəsmi bildirib ki, Hörmüz boğazının yenidən açılması üçün əvvəlcə İranın irəli sürdüyü şərtlər yerinə yetirilməlidir.

Onun sözlərinə görə, yalnız bundan sonra Tehranın nüvə proqramı ilə bağlı danışıqlara başlanıla bilər.

İran rəsmisi vasitəçi ölkələrin tərəflər arasındakı fikir ayrılıqlarını azaltmaq üçün intensiv diplomatik səylər göstərdiyini qeyd edib.

Bununla yanaşı, o, ABŞ-nin bölgədə və onun hüdudlarından kənarda İrana qarşı yeni hərbi zərbələr endirəcəyi təqdirdə Tehranın sərt cavab verəcəyi barədə xəbərdarlıq edib.

Məlumata görə, Qətərin vasitəçiliyi ilə tərəflər arasında mümkün razılaşma layihəsi üzrə danışıqlar davam etdirilir. Lakin əsas fikir ayrılıqları hələ də aradan qaldırılmayıb.

Mövzular:

İran ABŞ Tehran Vaşinqton Hörmüz boğazı nüvə danışıqları

🖨 Çap et

13:30 03.11.2026

Oxunuş sayı: 63