Hərbçilərin saxlanılması iddiaları Ukraynada etirazlara səbəb olub
Ukraynanın paytaxtı Kiyev yaxınlığında hərbçilərin qanunsuz saxlanılması və işgəncəyə məruz qalması barədə iddialar kütləvi etirazlara və təhlükəsizlik qüvvələri ilə qarşıdurmaya səbəb olub.
Crossmedia.az xəbər verir ki, “Deutsche Welle” və “The Kyiv Independent” hadisə ilə bağlı məlumat yayıb.
Hadisə noyabrın 2-də Kiyev vilayətinin Petropavlivska Borşahivka yaşayış məntəqəsində baş verib.
Sosial şəbəkələrdə yayılan məlumatlarda şəxsi evin zirzəmisində 30–40 nəfərin qanunsuz saxlanıldığı və bəzi hərbçilərin döyüldüyü iddia olunub.
Bu məlumatlardan sonra hərbçilərin yaxınları və yerli sakinlər binanın qarşısına toplaşaraq içəridəki şəxslərin azad edilməsini tələb ediblər.
Etirazçılarla təhlükəsizlik qüvvələri arasında qarşıdurma yaşanıb. Ərazidə atəş səslərinin eşidildiyi və Milli Qvardiyaya məxsus avtobusa ziyan vurulduğu bildirilib.
Ukrayna Milli Qvardiyasının “Azov” 1-ci korpusu binanın öz bölməsinin müvəqqəti yerləşmə məntəqəsi kimi istifadə edildiyini təsdiqləyib.
Qurumun açıqlamasına görə, burada yeni səfərbər edilmiş şəxslər, eləcə də hərbi hissələrini icazəsiz tərk etdikdən sonra geri qaytarılan hərbçilər yerləşdirilib. Onların hərbi hissələrə bölüşdürülməsini gözlədikləri bildirilib.
Milli Qvardiyanın komandanı Aleksandr Pivnenko xəsarətləri olan dörd hərbçinin müayinə üçün xəstəxanaya göndərildiyini açıqlayıb. Bununla belə, Ukrayna polisi qanunsuz saxlanılma barədə iddiaları təsdiqləməyib.
“Azov”un komandiri Denis Prokopenko hadisə ətrafında yayılan məlumatların Rusiyanın maraqlarına xidmət etdiyini bildirib. O, qanunsuz zorakılıq faktları müəyyənləşdirilərsə, təqsirkarların məsuliyyətə cəlb olunacağını qeyd edib.
Hadisə yerinə Ukrayna Prezident Ofisinin rəhbəri Kirill Budanov da gəlib. O, baş verənləri qəbuledilməz adlandıraraq bütün halların araşdırılacağını bildirib.
Ukraynanın hərbi ombudsmanı Olqa Reşetilova məsələ ilə bağlı yoxlama aparılacağını açıqlayıb. Daxili işlər naziri də hadisənin araşdırılmasına göstəriş verib.
Qeyd edək ki, binanın gizli həbsxana kimi fəaliyyət göstərməsi və orada sistemli işgəncələrin tətbiq olunması barədə iddialar hələlik müstəqil şəkildə təsdiqlənməyib.
14:39 03.11.2026
Oxunuş sayı: 58
