Lavrov Qərbi Rusiyaya qarşı müharibə başlatmaqda ittiham edib
Rusiyanın xarici işlər naziri Sergey Lavrov Qərb ölkələrini Avropada təhlükəsizlik prinsiplərini pozmaqda və NATO-nu şərqə doğru genişləndirməklə Rusiya ilə qarşıdurmanı gücləndirməkdə ittiham edib.
Crossmedia.az xəbər verir ki, Lavrov bu barədə beynəlxalq təhlükəsizlik məsələlərinə münasibət bildirərkən danışıb.
Rusiya XİN rəhbəri xatırladıb ki, 1999-cu ildə İstanbulda və 2010-cu ildə Astanada keçirilən Avropada Təhlükəsizlik və Əməkdaşlıq Təşkilatının (ATƏT) sammitlərində təhlükəsizliyin bölünməzliyi prinsipi təsdiqlənib.
Onun sözlərinə görə, həmin sənədlərdə heç bir dövlətin öz təhlükəsizliyini başqalarının təhlükəsizliyi hesabına gücləndirməməsi və hər hansı təşkilatın Avro-Atlantik məkanda üstün mövqe iddiasında olmaması nəzərdə tutulub.
Lavrov iddia edib ki, Qərb ölkələri bu öhdəliklərə baxmayaraq, NATO-nun şərqə doğru genişlənməsini davam etdiriblər.
“Bütün bu təminatlara baxmayaraq, Qərb, ilk növbədə NATO şərqə doğru genişlənməyə başladı və Rusiya Federasiyasının qarşısını almağı açıq şəkildə öz məqsədi elan etdi”, – deyə nazir bildirib.
O, həmçinin Qərbi Ukrayna vasitəsilə Rusiyaya qarşı müharibə aparmaqda ittiham edib və Kiyevdəki hakimiyyətin konstitusiyaya zidd çevriliş nəticəsində formalaşdığını iddia edib.
Qeyd edək ki, ATƏT-in 1999-cu il İstanbul və 2010-cu il Astana sənədlərində təhlükəsizliyin bölünməzliyi ilə yanaşı, dövlətlərin öz təhlükəsizlik siyasətini və ittifaqlarını sərbəst seçmək hüququ da təsbit olunub.
Qərb ölkələri isə Rusiyanın Ukraynaya qarşı hərbi əməliyyatlarına haqq qazandırmaq üçün irəli sürdüyü arqumentləri qəbul etmir.
15:29 03.11.2026
Oxunuş sayı: 55
