İsrail müxalifəti Netanyahunu hakimiyyətdən uzaqlaşdırmaq üçün razılığa gəlib
İsraildə müxalifət partiyaları Baş nazir Benyamin Netanyahunun rəhbərlik etdiyi hökuməti əvəzləmək və yeni hökumətin formalaşdırılması prosesini sürətləndirmək istiqamətində birgə fəaliyyət göstərmək barədə razılığa gəliblər.
Crossmedia.az xəbər verir ki, “The Jerusalem Post” və “The Times of Israel” bu barədə məlumat yayıb.
Bildirilib ki, müxalifət liderləri noyabrın 3-də Herzliya şəhərində görüşərək yeni hökumətin formalaşdırılması istiqamətində atılacaq addımları müzakirə ediblər.
Tərəflər “Yaşar” partiyasının lideri, İsrail ordusunun keçmiş Baş Qərargah rəisi Qadi Ayzenkotun baş nazir vəzifəsinə namizədliyini dəstəkləmək barədə mövqelərini uzlaşdırıblar.
Müxalifətin əsas məqsədi koalisiya danışıqlarını sürətləndirmək, yeni hökuməti mümkün qədər tez formalaşdırmaq və ölkədə növbədənkənar seçkilərin təkrar keçirilməsinin qarşısını almaqdır.
Qeyd edək ki, oktyabrın 27-də keçirilən parlament seçkilərində heç bir siyasi blok Knessetdə hökuməti təkbaşına formalaşdırmaq üçün tələb olunan 61 mandatı əldə edə bilməyib.
Netanyahunun rəhbərlik etdiyi blok 53, Ayzenkotu dəstəkləyən müxalifət partiyaları isə 48 mandat qazanıb. Ərəb partiyalarının 19 mandatı yeni hökumətin formalaşdırılması prosesində mühüm əhəmiyyət daşıyır.
Bununla belə, müxalifət daxilində koalisiyanın tərkibi ilə bağlı fikir ayrılıqları qalır. Xüsusilə, Aviqdor Liberman ərəb partiyalarının kənardan dəstəklədiyi azlıq hökumətində iştirak etməyəcəyini bildirib.
Yeni hökumətin formalaşdırılması üçün İsrail Prezidenti İsxak Hersoqun müvafiq namizədə mandat verməsi gözlənilir.
15:55 03.11.2026
Oxunuş sayı: 52
