Qırğızıstanda üzü örtməyə görə cərimələr tətbiq olunub – 10 qadın məsuliyyətə cəlb edilib
Qırğızıstanda ictimai yerlərdə üzü örtən 10 qadın inzibati məsuliyyətə cəlb olunub. Onlar hər biri 20 min som (təxminən 225 ABŞ dolları) məbləğində cərimələnib. Bu barədə yerli media və hüquq-mühafizə orqanları məlumat yayıb.
Crossmedia.az xəbər verir ki,məlumata görə, cərimələr ölkədə ictimai təhlükəsizlik və şəxsiyyətin identifikasiyası ilə bağlı qəbul edilən yeni qanunvericilik tələbləri çərçivəsində tətbiq edilib. Qanuna əsasən, ictimai yerlərdə üzü tam örtən geyim formalarına məhdudiyyət qoyulub. İstisna hallara tibbi göstərişlər, hava şəraiti və ya peşə fəaliyyəti ilə bağlı hallar daxildir.
Rəsmi qurumlar bildirir ki, bu addımın əsas məqsədi ictimai asayişin qorunması, cinayətlərin qarşısının alınması və vətəndaşların təhlükəsizliyinin təmin edilməsidir. Hüquq-mühafizə orqanları yeni qaydaların bundan sonra da ciddi şəkildə icra olunacağını vurğulayıb.
Bununla yanaşı, yeni qanun cəmiyyətdə geniş müzakirələrə səbəb olub. Bəzi vətəndaşlar və hüquq müdafiəçiləri bu cür məhdudiyyətlərin insan hüquq və azadlıqlarına təsir göstərə biləcəyini bildirir, digərləri isə təhlükəsizlik baxımından tədbiri zəruri hesab edirlər.
Qeyd edək ki, Qırğızıstanda ictimai yerlərdə geyim qaydaları ilə bağlı dəyişikliklər son dövrlər region ölkələrində aparılan oxşar müzakirələrin fonunda gündəmə gəlib.
Nastya Qəniyeva
21:10 30.12.2025
Oxunuş sayı: 1415
