FBK Krımda Putinə aid olduğu iddia edilən yeni “saray”ın aşkarlandığını açıqlayıb
Korrupsiyaya Qarşı Mübarizə Fondu Krımın ilhaq edilmiş ərazisində, Aya burnunda Rusiya Prezidenti Vladimir Putinə aid olduğu iddia edilən yeni “saray”ın aşkarlandığını bildirib.
Bu barədə Crossmedia.az xarici KİV-ə istinadən xəbər verir.
Araşdırmaçıların məlumatına görə, obyekt əvvəllər Ukraynanın sabiq prezidenti Viktor Yanukoviçə məxsus “bağ evi” olub. Krımın ilhaqından sonra həmin ərazi Putinin ətrafı ilə əlaqəli strukturların balansına verilib və Federal Mühafizə Xidmətinin tələblərinə uyğun şəkildə yenidən qurulub.
FBK-nın iddiasına əsasən, kompleksin rekonstruksiyasına azı 10 milyard rubl xərclənib. Bildirilir ki, yaşayış sahələri ilə yanaşı, binada əməliyyat otağı, süni tənəffüs aparatları, rentgen avadanlığı, həmçinin qastro- və kolonoskopiya üçün cihazlarla təchiz olunmuş “ev tipli xəstəxana” da mövcuddur.
Rəsmi qurumlar yayılan iddialara hələlik münasibət bildirməyib.
Türkanə Məşədiyeva
16:31 30.12.2025
Oxunuş sayı: 3527
