Lukaşenko 22 nəfəri, o cümlədən 20 siyasi məhbusu əfv edib
Belarus prezidenti Aleksandr Lukaşenko 22 nəfərin əfv edilməsi barədə sərəncam imzalayıb. Əfv olunanlar arasında 20 siyasi məhbusun olduğu bildirilir.
Crossmedia.az xəbər verir ki,rəsmi məlumata görə, qərar humanitar əsaslarla qəbul edilib və əfv edilən şəxslər müxtəlif cinayət maddələri ilə məhkum olunmuşdular. Hakimiyyət orqanları qeyd edir ki, əfv prosesi zamanı məhbusların sağlamlıq vəziyyəti, ailə şəraiti və peşmanlıq faktorları nəzərə alınıb.
Müxalifət və hüquq müdafiəçiləri isə bu addımı ehtiyatla qarşılayaraq, ölkədə siyasi motivlərlə həbs olunan şəxslərin hələ də azadlığa buraxılmadığını bildirirlər. Onların fikrincə, bu qərar beynəlxalq ictimaiyyətin təzyiqləri fonunda atılmış qismən yumşalma addımı ola bilər.
Xatırladaq ki, Belarusda 2020-ci il prezident seçkilərindən sonra minlərlə müxalif fəal, jurnalist və vətəndaş cəmiyyəti nümayəndəsi saxlanılıb və bir çoxu siyasi məhbus kimi tanınıb. Beynəlxalq təşkilatlar Minskdən bütün siyasi məhbusların qeyd-şərtsiz azad olunmasını tələb edir.
Nastya Qəniyeva
13:53 30.12.2025
Oxunuş sayı: 3107
