Zelenski Kiyevdə hökumət binalarına hücum təhlükəsi barədə xəbərdarlıq etdi
Ukrayna Prezidenti Volodimir Zelenski Rusiyanın Kiyevdə hökumət binalarına zərbələr endirməyə hazırlaşdığını bəyan edib. Dövlət başçısının sözlərinə görə, Moskva bunun üçün informasiya zəmini formalaşdırır.
Bu barədə Crossmedia.az xarici mediaya istinadən xəbər verir.
Zelenski bildirib ki, Rusiya Federasiyasının guya öz iqamətgahlarından birinə hücum edilməsi ilə bağlı açıqlamaları növbəti yalandır və paytaxt Kiyevə, eləcə də dövlət qurumlarına zərbələr üçün bəhanə rolunu oynaya bilər.
O xatırladıb ki, oxşar hal artıq sentyabr ayında baş verib və həmin vaxt Ukrayna Nazirlər Kabineti raket hücumuna məruz qalıb.
Prezident qeyd edib ki, Ukrayna ilə ABŞ arasında son görüş və tərəflər arasında irəliləyiş Rusiyanı narahat edir, çünki Moskva müharibəni bitirmək istəmir və yalnız təzyiq yolu ilə buna məcbur edilə bilər.
Zelenski mümkün hücum təhlükəsi fonunda hər kəsi diqqətli olmağa çağırıb və bildirib ki, paytaxta zərbə endirilə bilər. O, həmçinin ABŞ Prezidenti Donald Trampın komandasını və Avropa ölkələrini prosesə fəal şəkildə qoşulmağa və müharibəni bitirmək istədiyini iddia edən tərəflərlə bağlı müvafiq addımlar atmağa çağırıb.
Türkanə Məşədiyeva
23:10 29.12.2025
Oxunuş sayı: 3527
