Taşiyev Çin şirkətindən qırğız dilini öyrənməyi tələb edib
Qırğızıstan Milli Təhlükəsizlik Dövlət Komitəsinin (MTDK) sədri Kamçıbek Taşiyev Çinin China Road şirkətinin nümayəndələrinə qırğız dilini öyrənmələri ilə bağlı göstəriş verib.
Bu barədə Crossmedia.az İssık-Kul vilayətində avtomobil yollarının tikintisi ilə bağlı keçirilən müşavirə zamanı səsləndirilən açıqlamalaya istinadən xəbər verir.
Taşiyev Barskoon–Karakol avtomobil yolunun hansı şirkət tərəfindən inşa edildiyini soruşaraq, Qırğızıstanda təxminən 20 ildir fəaliyyət göstərən şirkət əməkdaşlarının dövlət dilini bilməməsinə diqqət çəkib:
“Qırğız dilini niyə hələ də öyrənməmisiniz? China Road Qırğızıstanda neçə ildir fəaliyyət göstərir? 20 ildir işləyirsiniz, amma qırğız dilində danışa bilmirsiniz. Öyrənin,” – deyə Kamçıbek Taşiyev bildirib.
Bununla yanaşı, MTDK sədri 75 kilometr uzunluğunda olan yolun tikinti müddətini də müzakirə edib. Şirkət nümayəndəsi müqaviləyə əsasən layihənin 1 sentyabr 2028-ci ildə başa çatdırılmasının planlaşdırıldığını, lakin işlərin daha tez – 2027-ci ilin sonuna qədər tamamlanması üçün səy göstərəcəklərini qeyd edib.
Mehriban İbrahimli
17:26 29.12.2025
Oxunuş sayı: 3006
