Ermənistanda vətəndaşları təhlükəsizlik məsələsi narahat edir
Ermənistanda keçirilən rəy sorğusunun nəticələrinə görə, ölkə vətəndaşlarını narahat edən əsas problem təhlükəsizlik məsələsidir. MPG/Gallup International Association tərəfindən aparılan sorğuda iştirak edənlərin 37,1 faizi təhlükəsizliklə bağlı narahatlığını ifadə edib.
Crossmedia.az xarici mediaya istinadən xəbər verir ki, sorğu nəticələrinə əsasən, respondentlərin 23,4 faizi aşağı maaş və pensiyaları əsas problem kimi göstərib. İqtisadi vəziyyətdən narazı olanların payı 13,8 faiz, işsizlikdən narahat olanların payı isə 13,3 faiz təşkil edib. İnflyasiya 12 faiz respondent üçün əsas problem sayılıb.
Bununla yanaşı, sorğuda iştirak edənlərin 11,3 faizi təhsil sisteminin vəziyyətindən, 9,8 faizi sərhədlərin dəqiqləşdirilməsi məsələsindən, 8,6 faizi səhiyyə sisteminin vəziyyətindən narahat olduqlarını bildiriblər. Sosial vəziyyət və yoxsulluq problemi 5,3 faiz, havanın çirklənməsi isə 5,1 faiz respondent tərəfindən önə çəkilib.
Respondentlərin 4,7 faizi hakimiyyətlə kilsə arasında qarşıdurmanı problem hesab edib. 3 faiz iştirakçı Bakıda saxlanılan erməni hərbi cinayətkarlarının geri qaytarılması məsələsini qeyd edib. Cəmiyyətdə həmrəyliyin olmaması, ictimai nəqliyyat, yüksək kommunal xərclər və xarici siyasət məsələlərinin hər biri 2,7 faiz respondent tərəfindən problem kimi göstərilib. "Artsax məsələsi"ni əsas problem sayanların payı 2,5 faiz olub. Korrupsiya və yüksək vergilər isə hər biri 2 faiz respondent üçün əsas narahatlıq doğuran mövzular sırasındadır. Digər problemləri qeyd edənlərin payı 13 faiz, cavab verməkdə çətinlik çəkənlərin payı isə 6,2 faiz təşkil edib.
Qeyd edək ki, sorğu 24–27 dekabr tarixlərində telefon vasitəsilə keçirilib və ümumilikdə 1000 respondent iştirak edib.
Nigar Yahyazadə
14:15 29.12.2025
Oxunuş sayı: 3062
