Abramoviç “Çelsi”nin satışından əldə olunan vəsaiti Kiyevə köçürməkdən imtina edib
Rusiyalı milyarder Roman Abramoviç “Çelsi” futbol klubunun satışından əldə olunan vəsaitin Ukraynaya (Kiyevə) köçürülməsi ilə bağlı qərardan imtina edib.
Crossmedia.az xəbər verir ki,məlumata görə, Abramoviçin nümayəndələri bildiriblər ki, sözügedən maliyyə vəsaitinin köçürülməsi hazırda mümkün deyil. Buna səbəb Britaniyanın Cersi adasının (Jersey) hakimiyyət orqanları tərəfindən iş adamına qarşı başladılmış araşdırma və məhkəmə prosesinin hələ başa çatmamasıdır. Nümayəndələrin sözlərinə görə, hüquqi prosedurlar yekunlaşmadan hər hansı transfer həyata keçirilə bilməz.
Xatırladaq ki, Roman Abramoviç 2022-ci ildə Böyük Britaniyanın sanksiyaları fonunda “Çelsi” futbol klubunu satmağa məcbur olmuşdu. Klubun satışından əldə olunan milyardlarla funt-sterlinqin Ukraynada humanitar məqsədlər üçün istifadə olunacağı açıqlanmışdı. Lakin vəsait uzun müddətdir ki, dondurulmuş vəziyyətdə qalır.
Məsələ ətrafında mübahisələr davam edir və Böyük Britaniya hökuməti, eləcə də beynəlxalq qurumlar vəsaitin taleyi ilə bağlı yekun qərarın məhkəmə proseslərindən sonra veriləcəyini bildirirlər.
Nastya Qəniyeva
13:25 29.12.2025
Oxunuş sayı: 3293
