Xarici xəbərlər

Türkiyənin sabiq baş naziri: İsrail Somalilenddə peyk-dövlət yaratmaq və fələstinliləri ora köçürmək planı qurur

Türkiyənin sabiq baş naziri Əhməd Davudoğlu İsrailin Somalilendlə bağlı planları barədə ciddi açıqlama verib.

Crossmedia.az bu barədə xarici mediaya istinadən xəbər verir.

O bildirib ki, İsrailin Somalilenddə başladığı proses yalnız bu regionla məhdudlaşmayacaq və uzun müddətdir hazırlanan genişmiqyaslı layihənin tərkib hissəsidir.

Davudoğlunun sözlərinə görə, əsas məqsəd Ədən körfəzi və Qırmızı dənizə çıxış nöqtəsində İsraildən asılı olan bir peyk-dövlət yaratmaqdır. Bu plan Türkiyə, Misir və Səudiyyə Ərəbistanını bir tərəfdən, Yəməni isə digər tərəfdən əhatəyə alaraq regionda yeni vətəndaş müharibəsini alovlandırmağa hesablanıb.

O vurğulayıb ki, planın ən təhlükəli tərəfi fələstinlilərin Somalilendə köçürülməsinin nəzərdə tutulmasıdır:

“Onların gizli razılaşmasının mahiyyəti də məhz budur. Buna qarşı son dərəcə qətiyyət və israrla mübarizə aparmalıyıq”, – deyə Davudoğlu qeyd edib.

Sabiq baş nazir əlavə edib ki, Somalilendin sadə sakinləri İsrail tərəfindən tanınma xəbərinə sevinərək bunun iqtisadi inkişaf, turizm və kənd təsərrüfatına sərmayə gətirəcəyini düşünürlər. Lakin onun fikrincə, bu prosesin bölgəyə gətirəcəyi yeganə nəticə yeni bir müharibə olacaq.

🖨 Çap et

13:20 29.12.2025

Oxunuş sayı: 3509