Kim Çen İn uzaqmənzilli strateji qanadlı raketlərin buraxılışını izləyib
Şimali Koreya lideri Kim Çen In ölkənin strateji qüvvələri tərəfindən həyata keçirilən uzaqmənzilli qanadlı raketlərin sınaq buraxılışını şəxsən izləyib. Rəsmi məlumatlara görə, buraxılış zamanı raketlər əvvəlcədən müəyyən edilmiş xüsusi trayektoriya üzrə uçaraq hədəfi dəqiqliklə məhv edib.
Crossmedia.az xəbər verir ki,raketlərdən biri 10 min 199 saniyə, digəri isə 10 min 203 saniyə uçuş müddətindən sonra hədəfə çatıb. Bu göstəricilər raketlərin uzunmüddətli uçuş qabiliyyətinə və yüksək dəqiqliyinə malik olduğunu nümayiş etdirir.
Sınaqların məqsədinin ölkənin strateji çəkindirmə potensialını gücləndirmək, eləcə də uzaqmənzilli zərbə vasitələrinin etibarlılığını və döyüş hazırlığını yoxlamaq olduğu vurğulanır. Kim Çen In raket sınaqlarının nəticələrini yüksək qiymətləndirərək, strateji qüvvələrin modernləşdirilməsinin davam etdirilməsinin vacibliyini qeyd edib.
Hadisə regionda təhlükəsizlik məsələləri fonunda baş verdiyindən, beynəlxalq ictimaiyyət tərəfindən də diqqətlə izlənilir.
Nastya Qəniyeva
12:00 29.12.2025
Oxunuş sayı: 2711
