Rusiyanın “Oreshnik” raket kompleksi Belarusda yerləşdirilə bilər
Peyk görüntülərinin təhlili əsasında Rusiyanın “Oreshnik” adlı orta mənzilli ballistik raket kompleksinin Belarus Respublikasının Mogilyov vilayətində yerləşən “Kriçev-6” aerodromu ərazisində yerləşdirildiyi ehtimal edilir.
Crossmedia.az xarici KİV-ə istinadən xəbər verir ki, mütəxəssislər görüntülər vasitəsilə Belarus ərazisində əvvəllər RSMD-10 “Pioner” raket kompleksinin yerləşdiyi təxminən 15 köhnə mövqeni yenidən müəyyən ediblər.
Analitiklərin diqqət çəkdiyi mövqelərdən biri olan “Kriçev-6” aerodromunda dəmir yolu qovşağının və kamuflyaj edilmiş beton meydançanın inşa edildiyi qeydə alınıb. Bildirilir ki, bu cür infrastruktur elementləri raket bazaları üçün xarakterik hesab olunur.
Qeyd olunur ki, “Oreshnik” kompleksinin ehtimal edilən mövqeyi Ukrayna sərhədindən təxminən 180 kilometr, Avropa sərhədindən isə 400 kilometr məsafədə yerləşir. Həmin ərazi eyni zamanda Rusiya sərhədindən cəmi 4 kilometr aralıdır.
Türkan Kərimli
20:40 28.12.2025
Oxunuş sayı: 1138
