Xarici xəbərlər

İtaliyada QHT-lər vasitəsilə HƏMAS-ın maliyyələşdirilməsi sxemi ifşa olunub

İtaliya hüquq-mühafizə orqanları Fələstinlilərə humanitar yardım adı altında fəaliyyət göstərən xeyriyyə təşkilatları vasitəsilə HƏMAS-ın maliyyələşdirilməsi ilə bağlı genişmiqyaslı sxemi aşkar ediblər.

Crossmedia.az Corriere Della Sera nəşrinə istinadən xəbər verir ki, istintaq çərçivəsində İtaliyada qeydiyyatdan keçmiş üç qeyri-hökumət təşkilatının fəaliyyəti araşdırılıb.

Bunlar 1994-cü ildə Genuyada təsis edilən “Fələstin Xalqı ilə Həmrəylik Xeyriyyə Assosiasiyası”, 2003-cü ildə yaradılmış eyni adlı könüllü təşkilat və həmin il Milanda təsis edilən “Qızıl Günbəz” fondu olub.

Müstəntiqlərin bildirdiyinə görə, bu üç QHT tərəfindən toplanan vəsaitin təxminən 70 faizindən çoxu – ümumilikdə 7 milyon avro – Avropa İttifaqı tərəfindən terror təşkilatı kimi tanınan HƏMAS-ın, o cümlədən onun hərbi qanadının dəstəklənməsi üçün istifadə edilib. Qeyd olunur ki, sözügedən təşkilatların hamısı hüquq-mühafizə orqanları tərəfindən “İtaliya HƏMAS özəyinin lideri” kimi tanınan Məhəmməd Hannun tərəfindən idarə olunub.

Milli Terrorla Mübarizə Prokurorluğunun koordinasiyası ilə polis və Guardia di Finanza əməkdaşlarının keçirdiyi əməliyyat nəticəsində Məhəmməd Hannun da daxil olmaqla 7 nəfər saxlanılıb. Daha iki nəfər isə hazırda axtarışdadır.

İtaliya təhlükəsizlik qurumlarının rəsmiləri bildiriblər ki, istintaqın aparılmasında İsrail tərəfindən təqdim edilən kəşfiyyat və materiallar mühüm rol oynayıb. Hazırda iş üzrə araşdırmalar davam etdirilir.

🖨 Çap et

15:25 28.12.2025

Oxunuş sayı: 1051