Belarusun müdafiə naziri: NATO real müharibəyə hazırlaşır
Belarusun müdafiə naziri Viktor Xrenin NATO-nun sadəcə güc nümayiş etdirmədiyini, əksinə real müharibəyə hazırlaşdığını bildirib.
Crossmedia.az xarici mediaya istinadən xəbər verir ki, nazirin sözlərinə görə, bu, qonşu ölkələrin liderlərinin davranışlarında açıq şəkildə müşahidə olunur. O qeyd edib ki, həmin ölkələr hərbi gərginliyin azaldılması çağırışlarını qəbul etmir və Rusiya ilə yanaşı, Belarusun da təhlükə kimi təqdim olunduğunu göstərirlər. Xrenin vurğulayıb ki, Rusiya və Belarus İttifaq Dövləti çərçivəsində birgə hərəkət edir.
Viktor Xrenin Avropada regional liderlik uğrunda rəqabətin də gərginliyi artırdığını bildirib. Onun fikrincə, Polşa, Almaniya və Fransa lider mövqe uğrunda mübarizə aparır, Baltik ölkələri isə bu prosesdə daha sərt mövqe nümayiş etdirir.
Belarusun müdafiə naziri xüsusilə NATO ölkələrinin hərbi xərclərinin artmasına diqqət çəkib. O qeyd edib ki, bəzi ölkələr ümumi daxili məhsulun 5 faizindən çoxunu müdafiə xərclərinə ayırır ki, bu da real müharibəyə hazırlıq əlaməti kimi qiymətləndirilir. Nazirin sözlərinə görə, bu bəyanatlar blef deyil və NATO-nun ciddi şəkildə hərbi ssenarilərə hazırlaşdığını göstərir.
Nigar Yahyazadə
00:25 27.12.2025
Oxunuş sayı: 1196
