Ankarada təyyarə qəzası: qara qutular üçün xarici ekspertiza
Ankara ətrafında baş verən təyyarə qəzası beynəlxalq diqqət mərkəzinə düşüb. Liviya Baş Qərargahının nümayəndə heyətini daşıyan hava gəmisinin qəzaya uğramasından sonra hadisənin səbəblərinin obyektiv şəkildə araşdırılması üçün qara qutuların xarici ölkədə ekspertizadan keçirilməsi ehtimalı irəli sürülüb.
Crossmedia.az xarici mediaya istinadən xəbər verir ki, Ankara yaxınlığında Liviya Baş Qərargahının nümayəndə heyətini daşıyan təyyarənin qəzaya uğraması ilə bağlı aparılan istintaq çərçivəsində qara qutular müstəqil ekspertiza üçün Almaniyaya göndərilə bilər. Bu barədə Türkiyənin ədliyyə naziri Yılmaz Tunç NTV telekanalına açıqlama verib.
Nazirin sözlərinə görə, qara qutuların neytral ölkədə araşdırılması zərurəti yarandığından Almaniya ilə əlaqə saxlanılıb. Hazırda təyyarəyə aid qara qutular Türkiyədə mütəxəssislər tərəfindən öyrənilir və qəzanın səbəbləri ilə bağlı ilkin nəticələrin hazırlanması gözlənilir.
Axtarış-xilasetmə əməliyyatı zamanı hadisə yerində iki qurğu — bort səs yazıcısı və uçuş məlumatları registratoru aşkar edilib.
Yılmaz Tunç bildirib ki, məhkəmə-tibbi ekspertiza prosesi davam edir, tapılan DNT nümunələri Liviyadan göndərilmiş nümunələrlə tutuşdurulur. Məhkəmə istintaqı təyyarənin gəlişi, gedişi, uçuşu və enişi ilə bağlı bütün detalları, həm ekipajın, həm də digər əməkdaşların fəaliyyəti baxımından diqqətlə araşdırır.
Eyni zamanda qəza yerində Liviya nümayəndə heyəti və bu reysi xidmətlə təmin edən Fransa şirkətinin təmsilçiləri tərəfindən də yoxlamalar aparılıb.
Zeynəb Xuduyeva
19:05 26.12.2025
Oxunuş sayı: 1025
