ABŞ arxivi: 1993-cü ildə Ermənistan Qarabağın müstəqil olmayacağını etiraf edib
1993-cü ilin mayında ABŞ Dövlət Katibinin postsovet ölkələri üzrə xüsusi nümayəndəsi Strob Telbot Ermənistan və Azərbaycana səfər edib. Bu barədə ABŞ Milli Təhlükəsizlik Arxivinin yaydığı sənədlərdə qeyd olunur. Səfərlə bağlı hesabat 19 may 1993-cü ildə Con Qordon tərəfindən ABŞ-ın müdafiə naziri üçün hazırlanıb.
Crossmedia.az xəbər verir ki, sənədlərə görə, Telbotun İrəvan və Bakıdakı görüşlərində əsas müzakirə mövzusu Qarabağ müharibəsi olub. Ermənistan tərəfi ölkədə iqtisadi vəziyyətin son dərəcə ağır olduğunu bildirib. Ermənistan rəhbərliyi dövlət büdcəsinin 229 milyon rubl təşkil etdiyini, bunun 50 milyonunun Qarabağa yardım məqsədilə ayrıldığını qeyd edib.
Hesabatda yer alan məlumata görə, Ermənistan Prezidenti Telbotla şəxsi söhbətində müstəqil Dağlıq Qarabağın heç vaxt mövcud olmayacağını və heç vaxt Ermənistanın tərkib hissəsi ola bilməyəcəyini anladığını deyib. O, münaqişənin tezliklə həllində maraqlı olduğunu və Qarabağ ermənilərinə müəyyən dərəcədə siyasi və mədəni muxtariyyət verilməsi imkanlarını nəzərdən keçirməyə hazır olduğunu bildirib. Ermənistan prezidenti bu mövqeyin Azərbaycan rəhbərliyinə çatdırılmasını xahiş edib. Bununla yanaşı, sənəddə münaqişənin yaxın zamanda həll olunacağına dair nikbinliyin zəif olduğu vurğulanır.
Bakıda aparılan danışıqlarda isə Azərbaycan tərəfi heç vaxt təslim olmayacaqlarını bildirib. Azərbaycan rəsmiləri Qarabağ üzərində nəzarətin bərpa olunduğunu və atəşkəs, eləcə də bəzi bölgələrdən qoşunların çıxarılmasını nəzərdə tutan razılaşmaların imzalanmaq üzrə olduğunu qeyd ediblər.
Sənədlərdə Azərbaycanın Qarabağ münaqişəsində Rusiya qoşunlarının birbaşa iştirak etdiyini düşündüyü də yer alır. Azərbaycan tərəfinin fikrincə, Moskva hər iki ölkəni MDB-yə cəlb etmək məqsədilə bölgədə qeyri-sabitliyi qoruyub saxlayır. Eyni zamanda, hesabatda Rusiya ordusunun Azərbaycandan sürətlə çıxarıldığı, yalnız təxminən 2 min paraşütçünün və erkən xəbərdarlıq sistemləri üçün radar heyətinin qaldığı bildirilir.
Hesabatda Azərbaycanda islam fundamentalizminin ciddi problem kimi qiymətləndirilmədiyi, əhalinin aşırı dindar olmadığı barədə fikirlərin səsləndirildiyi də qeyd olunur.
19:20 26.12.2025
Oxunuş sayı: 913
