Putin ABŞ-nin Ukrayna üzrə mövqeyini dəyişməsini “zəiflik” adlandırıb
Rusiya Prezidenti Vladimir Putin Ukrayna ilə bağlı ABŞ-lə aparılan danışıqlarda Vaşinqtonun Avropa ilə məsləhətləşmələrdən sonra mövqeyini dəyişməsini “zəiflik” kimi qiymətləndirib.
Bu barədə Crossmedia.az “Kommersant” nəşrinə istinadən xəbər verir.
Məlumata görə, Putin bu fikirləri iri biznes nümayəndələri ilə keçirdiyi qapalı görüş zamanı səsləndirib. O bildirib ki, Rusiya ABŞ-lə danışıqlarda Donbasın hazırda Ukrayna Silahlı Qüvvələrinin nəzarətində olan ərazilərinin Moskvaya verilməsini tələb etməkdə davam edir.
Rusiya prezidenti Ankoricdə əldə olunmuş razılaşmaları xatırladaraq, əvvəllər qəbul etdiyi müəyyən güzəştlərə getməyə hazır olduğunu da qeyd edib. Bununla yanaşı, Putin Kramatorsk–Konstantinovka–Slavyansk qovşağı məsələsinin “müzakirə mövzusu olmadığını” vurğulayıb.
Eyni zamanda o, ərazilərin qismən mübadiləsi variantının mümkünlüyünü istisna etməyib. Nəşrin yazdığına görə, bu açıqlamalar Rusiya–Qərb münasibətlərində Ukrayna mövzusunun hələ də əsas mübahisə predmetlərindən biri olaraq qaldığını göstərir.
Türkanə Məşədiyeva
13:30 26.12.2025
Oxunuş sayı: 1192
