Qazaxıstan neft ixracı üçün alternativ marşrutlar müəyyənləşdirildi
Qazaxıstanın magistral neft kəmərlərinin operatoru “Kaztransoyl” Xəzər Boru Kəməri Konsorsiumunun zədələnməsindən sonra neft tədarükü üçün yeni marşrutları razılaşdırıb. Bu barədə Qazaxıstanın Energetika Nazirliyi məlumat yayıb.
Crossmedia.az RIA Novostiyə istinadən xəbər verir.
Məlumata görə, noyabrın sonunda Ukrayna Silahlı Qüvvələrinin pilotsuz katerlərlə həyata keçirdiyi hücum nəticəsində neft terminalının üç yükgötürmə körpüsündən biri ciddi zədələnərək istismardan çıxıb. Hadisədən sonra Energetika Nazirliyi neftin daşınması üçün bütün mümkün logistika variantlarını işə salıb.
“Kaztransoyl” ixrac axınlarının bir hissəsini Samara istiqamətinə, Bakı–Tbilisi–Ceyhan neft kəmərinə, eləcə də qismən Çin bazarına yönəldib.
Nazirliyin məlumatına görə, hücumlar Qazaxıstanın neft hasilatına 480 min ton həcmində itkiyə səbəb olub. Bununla belə, rəsmi Astana KTK marşrutundan imtina etmir, çünki bu istiqamətə bərabər alternativ mövcud deyil.
Energetika Nazirliyində bildirilib ki, logistika qəbul edən tərəflərin texniki imkanları nəzərə alınmaqla çevik şəkildə tənzimlənir. Hazırda əsas prioritet gündəlik hasilat həcmlərinin qorunması, ixracın sabitliyinin təmin edilməsi və iqtisadi risklərin minimuma endirilməsidir.
Qeyd olunur ki, Qazaxıstan neft ixracının 80 faizdən çoxu KTK vasitəsilə həyata keçirilir. Alternativ marşrutlardan biri Baltik dənizi sahilində yerləşən Ust-Luqa limanıdır. Lakin bu istiqamət daha baha başa gəlir və tədarükün davamlılığı “Transneft”in ötürmə imkanlarından asılıdır.
Türkanə Məşədiyeva
18:20 23.12.2025
Oxunuş sayı: 863
