Ermənistanın "başı üzərindəki qara buludlar": İrəvan üçün təhdidlər var
Ermənistanın Baş naziri Nikol Paşinyan dekabrın 21-də Sankt-Peterburqda Ali Avrasiya İqtisadi Şurasının iclasında iştirak edəcək.
Bu səfər ikitərəfli münasibətlərin mövcud dinamikası baxımından diqqət çəkir. Belə ki, rəsmi İrəvan bəzən Moskva ilə münasibətləri tamamilə bloklayır, bəzən də Rusiyada keçirilən tədbirlərdə "can-başla" iştirak edir. Bu isə Rusiya- Ermənistan münasibətlərinin prspektivi baxımından fərqli alternativlər ortaya qoyur.
Keçmiş baş nazir, tanınmış siyasətçi Pənah Hüseyn bildirib ki, Ermənistan Avrasiya İttifaqının üzvüdür və iqtisadi baxımından bu təşkilatın, xüsusilə də Gömrük İttifaqının imkanlarından kifayət qədər inkişaf edir: "Bunu onlar özləri də bilir. Bu baxımdan Paşinyanın Ali Avrasiya İqtisadi Şurasında iştirakı məsələsində qeyri-adi, normadan kənar bir hal görmürəm. Lakin əsas məsələ ondan ibarətdir ki, hazırda Avrasiya məkanındakı digər ölkələr, xüsusilə də Rusiya tərəfindən Ermənistana müəyyən təzyiq siqnalları göndərilir. Bu təzyiqlər Ermənistanın son dövrlərdə Avropa İttifaqı ilə bağladığı tərəfdaşlıq sənədləri ilə bağlıdır. Rusiya tərəfindən həmin addımların Avrasiya İttifaqının nizamnaməsinə uyğun olmadığı barədə etirazlar səsləndirilir. Bu baxımdan Ermənistan üçün müəyyən problemlərin yaranması mümkündür. Yəni bu məsələ Ermənistanın Avrasiya İttifaqındakı fəaliyyətini tam dayandırması ilə bağlı deyil. Təhlükəsizlik müstəvisində isə, xüsusilə Kollektiv Təhlükəsizlik Müqaviləsi Təşkilatı (KTMT) çərçivəsində, artıq daha fərqli və ayrıca problemlər mövcuddur".
Fatimə Nəzərli
16:01 18.12.2025
Oxunuş sayı: 1058
