Türkiyəli nazir açıqladı: Azərbaycanın bu qədər ərazisi minalardan təmizlənib
Türkiyə Milli Müdafiə naziri Yaşar Gülər bildirib ki, Azərbaycan Silahlı Qüvvələrinin potensialının gücləndirilməsi sahəsində əməkdaşlıqda əhəmiyyətli irəliləyiş əldə olunub. Bu çərçivədə hərbi personalın təlim proqramları, yardım və məsləhət xidmətləri həyata keçirilir.
Crossmedia.az xəbər verir ki, nazir misal olaraq, bu ilin iyulunda İstanbulda keçirilmiş Beynəlxalq Müdafiə Sənayesi Sərgisi IDEF 2025-də Türkiyə və Azərbaycan arasında qarşılıqlı müdafiə təhlükəsizliyinin gücləndirilməsi Memorandumunun imzalanmasını qeyd edib.
Yaşar Gülər həmçinin Azərbaycan və Ermənistan arasında aparılan danışıqlar barədə danışaraq, Ankarada iki ölkə liderlərinin Vaşinqton görüşündə göstərdiyi sülh iradəsindən məmnunluğunu ifadə edib və genişmiqyaslı sülh sazişinin tezliklə imzalanacağına ümid etdiyini bildirib.
Türk nazir həmçinin işğaldan azad edilmiş ərazilərdə minalardan təmizləmə işlərində türk mütəxəssislərinin iştirak etdiyini açıqlayıb: Ağdam, Qubadlı, Cəbrayıl və Laçın rayonlarında təxminən 593 min kvadrat metr ərazi minalardan təmizlənib.
Əməkdaşlığın kartoqrafiya sahəsini də əhatə etdiyini bildirən Yaşar Gülər qeyd edib ki, Türkiyə Müdafiə Nazirliyinin Baş Kartoqrafiya İdarəsi Azərbaycan üçün xəritə istehsalı xəttinin yaradılmasına dəstək verib: "Bu, qardaş ölkəyə öz xəritələrini hazırlamaq imkanı verir". Nazir əlavə edib ki, kartoqrafiya sahəsində məsləhət dəstəyi və kadr hazırlığı üzrə əməkdaşlıq davam edir.
Sevinc Yarməmmədova
17:23 26.11.2025
Oxunuş sayı: 667
