Rusiya hər yerdən qovulur – Suriya, Cənubi Qafqaz…
Rusiya və Ukrayna müharibəsi davam edir və Moskva bu savaşla bağlı müxtəlif bəyanatlar verir. Rusiya prezidentinin mətbuat katibi Dmitri Peskovun Ukraynanın böyük bir hissəsinin artıq Rusiyanın nəzarətində olduğu barədəki açıqlaması isə müzakirələrə yol açıb.
Hərbi ekspert Üzeyir Cəfərovla birlikdə Peskovun bəyanatlarını və Rusiya tərəfindən atılan addımların beynəlxalq hüquq və real vəziyyətlə necə ziddiyyət təşkil etdiyini təhlil etdik. Üzeyir Cəfərov, Dmitri Peskovun Ukraynanın böyük bir hissəsinin artıq Rusiyanın nəzarətində olduğu barədə açıqlamalarına sərt reaksiya bildirib. Cəfərov, Peskovun bəyanatlarını “başından böyük açıqlamalar” olaraq qiymətləndirib və onların heç bir hüquqi əsasının olmadığını vurğulayıb. O, Rusiya rəhbərliyinin beynəlxalq hüquqa və BMT Təhlükəsizlik Şurasının qərarlarına əməl etmədiyini qeyd edərək, Peskovun çıxışlarının yalnız Rusiyanın cinayətlərinə bəraət qazandırmağa çalışmaq məqsədini daşıdığını bildirib.
Cəfərov əlavə edib ki, bu gün keçirilən referendumlar beynəlxalq standartlara cavab vermir və Ukraynanın itirilmiş əraziləri – Zaporojye, Xerson artıq Ukrayna ordusunun nəzarətinə qayıdıb. Rusiyanın bu addımlarının yalnız təzyiq vasitəsi olduğunu qeyd edən Cəfərov, Trampın da Ukraynanın Rusiyaya qoşulması ilə bağlı fikirlərini sadəcə olaraq təzyiq mexanizmi kimi dəyərləndirib.
O, həmçinin qeyd edib ki, Peskovun bəyanatları sadəcə Rusiya rəhbərliyinin hərəkətlərinə hüquqi don geyindirmək məqsədini güdür. “Müharibə aparan ölkədə hansı referendumdan danışmaq olar? Referendumlar heç bir beynəlxalq standartlara cavab vermir. Rusiya hansı beynəlxalq hüquqa hörmətlə yanaşıb ki, indi referendumdan danışır?” – deyə Cəfərov bildirib.
Cəfərov Rusiyanın beynəlxalq aləmdə izolyasiya olduğunu və strateji məqsədlərini itirdiyini də əlavə edib. "Rusiya bütün dünyadan 'изгой' vəziyyətinə düşüb. Suriyadan qovulublar, Cənubi Qafqazdan qovulurlar. Bu gün Ermənistan parlamentinin spikeri Alen Simonyan da bəyanat verib ki, bizim Rusiyaya Azərbaycanla olan danışıqlarda vasitəçi kimi ehtiyacımız yoxdur. Rusiya hər yerdən qovulub" – deyə Cəfərov vurğulayıb. Onun fikrincə, Rusiya bu günə qədərki hərəkətləri ilə heç bir perspektivə sahib deyil və gələcəkdə daha da çətin duruma düşəcək.
NATO-nun Rusiyanı nüvə silahından başqa heç bir halda ciddiyə almadığını da qeyd edən Cəfərov, Rusiyanın beynəlxalq arenada yalnız təcavüzkar bəyanatlar verdiyini və bunlara etibar edilməməsi gərəkdiyini bildirib.
Nigar Yahyazadə
17:26 11.02.2025
Oxunuş sayı: 11052
