Marko Rubio Beynəlxalq Cinayət Məhkəməsini sərt tənqid edib
ABŞ-nin dövlət katibi Marko Rubio Beynəlxalq Cinayət Məhkəməsini (BCM) və Birləşmiş Millətlər Təşkilatını (BMT) sərt tənqid edərək beynəlxalq hüququn ABŞ-nin suverenliyinə qarşı siyasi vasitə kimi istifadə olunduğunu iddia edib.
Crossmedia.az xəbər verir ki, "Anadolu" agentliyi bu barədə məlumat yayıb.
Rubio noyabrın 13-də Vaşinqtonda keçirilən "Federalist Society" təşkilatının Milli Hüquqşünaslar Konvensiyasında çıxışı zamanı Donald Tramp administrasiyasının demək olar ki, bütün mühüm xarici siyasət qərarlarının beynəlxalq hüquq normaları əsasında tənqid olunduğunu bildirib.
O, buna misal olaraq Trampın Karib dənizində narkotik kartellərinə məxsus olduğu bildirilən qayıqlara hərbi zərbələr endirilməsi barədə göstərişini göstərib.
Dövlət katibi ABŞ qüvvələrinin 2026-cı ilin yanvarında Venesuela Prezidenti Nikolas Maduronu saxlayaraq mühakimə olunması üçün ABŞ-yə aparmasından sonra da BMT tərəfindən oxşar ittihamların səsləndirildiyini qeyd edib.
Rubio Beynəlxalq Cinayət Məhkəməsini "saxta və qeyri-legitim qurum" adlandıraraq onun fəaliyyətini kəskin tənqid edib.
Onun sözlərinə görə, beynəlxalq hüquq müəyyən qlobal qüvvələr tərəfindən universal prinsiplər adı altında öz maraqlarını irəli sürmək üçün istifadə olunur.
ABŞ rəsmisi Donald Trampın Beynəlxalq Cinayət Məhkəməsinə qarşı sanksiyalar tətbiq etmək qərarını da müdafiə edib.
Rubio bildirib ki, ABŞ vətəndaşları heç vaxt bu məhkəmənin yurisdiksiyasını qəbul etməyiblər. Bununla belə, BCM öz səlahiyyətlərini hətta onun yurisdiksiyasını tanımayan suveren dövlətlərə də şamil etməyə çalışır.
Dövlət katibi həmçinin ABŞ məhkəmə sistemində bəzi hakimlərin qərarlar vasitəsilə icra hakimiyyətinin fəaliyyətinə müdaxilə etdiyini iddia edib.
O, beynəlxalq hüququn ABŞ-ni zəiflətmək məqsədilə tətbiq edildiyi barədə mövqeyini təkrarlayaraq ölkəsinin bu cür yanaşmaları qəbul etmək məcburiyyətində olmadığını vurğulayıb.
Rubionun çıxışı konfrans iştirakçılarının alqışları ilə qarşılanıb.
15:37 14.11.2026
Oxunuş sayı: 134
