Bahalı soyuqdəymə və qrip dərmanları həqiqətən daha effektivdirmi?
Qrip və soyuqdəymə mövsümünün başlaması ilə apteklərdə bu xəstəliklərin simptomlarını aradan qaldırmaq üçün nəzərdə tutulan dərmanlara tələbat artır. Lakin tanınmış markaların istehsal etdiyi və daha yüksək qiymətə satılan preparatlar ucuz alternativlərdən nə dərəcədə fərqlənir?
Crossmedia.az BBC-ə istinadən məlumat verir ki, bəzi bahalı soyuqdəymə və qrip dərmanlarının tərkibi daha ucuz preparatlarla demək olar ki, eynidir. Hətta bəzi hallarda istehlakçılar oxşar təsiredici maddələrə görə 20 dəfədən çox pul ödəyirlər.
Mançester Universitetinin əczaçılıq bölməsinin rəhbəri, professor Ceyn Lourens tanınmış markaların məhsulları ilə daha ucuz alternativlər arasında ciddi effektivlik fərqinin olmadığını bildirir.
Araşdırmada qeyd olunur ki, məsələn, 16 ədəd “Lemsip All-In-One Max Strength” tabletinin qiyməti 7,30 funt sterlinq olduğu halda, bəzi supermarketlərdə eyni miqdarda parasetamolun qiyməti cəmi 0,35 funt təşkil edir. Hər iki preparatda 500 mq parasetamol mövcuddur. Bu maddə ağrıları azaltmağa və yüksək hərarəti aşağı salmağa kömək edir, lakin infeksiyanın özünü müalicə etmir.
Bəzi soyuqdəymə dərmanlarının tərkibində burun tutulmasını aradan qaldırmaq üçün istifadə olunan fenilefrin də var. Lakin professor Lourens bu maddənin tablet formasında qəbul edildikdə effektivliyinə dair sübutların məhdud olduğunu bildirir. Digər tərəfdən, bəzi preparatlarda bəlğəmi durulaşdırmaq məqsədilə istifadə olunan quanifenezin də mövcuddur.
Araşdırmada dərmanların qiymət fərqinin yalnız tərkiblə deyil, markaların reklam və marketinq strategiyaları ilə də əlaqəli olduğu vurğulanır. Tanınmış məhsulların mağazalarda daha görünən yerlərdə yerləşdirilməsi istehlakçıların seçimlərinə təsir göstərir.
Mütəxəssislər soyuqdəymə və qrip zamanı kifayət qədər istirahət etməyi, maye qəbulunu artırmağı və dərmanların tərkibinə diqqət yetirməyi tövsiyə edirlər. Xüsusilə parasetamol tərkibli bir neçə preparatın eyni vaxtda qəbulu təsadüfi doza aşımına səbəb ola bilər.
22:30 15.11.2026
Oxunuş sayı: 111
