Ukrayna ordusunun peyk rabitəsi problemi: Zelenski Vaşinqtona müraciət etdi
Ukrayna Prezidenti Volodimir Zelenski ABŞ-dən və İlon Maskın rəhbərlik etdiyi “SpaceX” şirkətindən Ukraynada hərbi təyinatlı "Starshield" peyk rabitə sisteminin fəaliyyətinə qoyulan məhdudiyyətləri aradan qaldırmağı tələb edib.
Crossmedia.az xəbər verir ki, bu barədə Zelenski Teleqram kanalında paylaşım edib.
Ukrayna lideri Rusiya zərbələrindən sonra ölkənin infrastrukturunda yaranmış kritik vəziyyətin peyk rabitəsi sisteminin fəaliyyətini daha da vacib etdiyini bildirib.
Zelenski bu məsələ ilə bağlı ABŞ və “SpaceX” ilə danışıqların intensivləşdirilməsi barədə göstəriş verdiyini qeyd edib. Onun sözlərinə görə, Xarici İşlər Nazirliyi, Müdafiə Nazirliyi və Prezident Administrasiyası bu istiqamətdə birgə işləməlidir.
Bundan əvvəl Zelenski Ukrayna Silahlı Qüvvələrinin artıq beş gündür Starshield sisteminə girişinin məhdudlaşdırıldığını bildirmişdi.
Noyabrın 12-də isə Ukrayna prezidenti Starlink sisteminin fəaliyyətində yaranan problemlərə görə İlon Maskı ittiham etmişdi. Bununla belə, “SpaceX” şirkəti peyk rabitəsi sisteminin fəaliyyətinin məhdudlaşdırılması ilə bağlı iddiaları təkzib edib.
Qeyd edək ki, Starshield “SpaceX” tərəfindən dövlət və hərbi qurumlar üçün hazırlanmış peyk rabitəsi sistemidir.
20:06 15.11.2026
Oxunuş sayı: 105
