ABŞ sərhədində dron təhlükəsi: 300-dən çox PUA zərərsizləşdirilib
Meksika narkokartelləri ABŞ sərhədçilərinin fəaliyyətini izləmək və qeyri-qanuni miqrantların sərhədi keçməsinə kömək etmək üçün pilotsuz uçuş aparatlarından (PUA) istifadə edir.
Crossmedia.az xəbər verir ki, bu barədə “El Universal” qəzeti məlumat yayıb.
Nəşrin sözlərinə görə, “Sinaloa”, “Xalisko – Yeni Nəsil” kartelləri və “Arelyano Feliks” qruplaşmasının üzvləri dronlar vasitəsilə sərhədçilərin iş qrafikini, hərəkət istiqamətlərini və hətta istirahət vaxtlarını izləyirlər. Məqsəd sərhədi qanunsuz keçmək üçün əlverişli məqamları müəyyənləşdirməkdir.
ABŞ Sərhəd Xidmətinin San-Dieqo sektorunun nümayəndəsi Xerardo Qutyerres bildirib ki, kartellər dronlardan yalnız narkotik daşınması üçün deyil, həm də sərhəd xidmətinin əməkdaşlarına nəzarət etmək üçün istifadə edirlər.
Onun sözlərinə görə, cinayətkar qruplaşmalar dronlar və telefon əlaqəsi vasitəsilə miqrantlara hərəkət istiqamətlərini, sərhədi keçmək üçün uyğun məntəqələri və onları götürəcək şəxslərin yerini bildirirlər.
Nəşrin məlumatına görə, ilin əvvəlindən ABŞ-nin Cənub Sərhədi üzrə Birgə Əməliyyat Qrupu 300-dən çox dronu zərərsizləşdirib.
Buna cavab olaraq ABŞ hakimiyyəti radarlar, yüksək keyfiyyətli kameralar, müşahidə qüllələri, süni intellekt və öz dronları vasitəsilə sərhəd nəzarətini gücləndirib.
Qutyerres quru sərhədində divarın möhkəmləndirilməsindən sonra Tixuana sahillərində dəniz yolu ilə qaçaqmalçılığın artdığını da bildirib. Miqrantlar reaktiv xizəklər və sürətli katerlərlə San-Dieqo sahillərinə daşınır. Belə daşımaların qiyməti 18-20 min dollar arasında dəyişir.
21:55 15.11.2026
Oxunuş sayı: 100
