ABŞ-də Trampın bağlamaq istədiyi tarixi parkın fəaliyyətinə məhkəmə mane olub
ABŞ-də federal hakim Donald Tramp administrasiyasının Vaşinqtonda yerləşən tarixi “East Potomac” parkını və qolf meydançasını bağlamasını müvəqqəti olaraq qadağan edib.
Crossmedia.az xəbər verir ki, bu barədə “BBC” məlumat yayıb.
ABŞ-nin dairə məhkəməsinin hakimi Ana Reyes Prezident Donald Trampın parkın yenidən qurulması planına qarşı bir neçə aydır davam edən məhkəmə prosesinə baxır. Tramp ərazinin genişmiqyaslı təmir işləri ilə əlaqədar noyabrın 15-dən bağlanacağını açıqlamışdı.
Hakim qərarına əsasən, Tramp administrasiyası parkı və qolf meydançasını bağlaya bilməz. Bununla belə, hökumətin həmin əraziləri fəal şəkildə idarə etmək öhdəliyi olmadığı da bildirilib.
Tramp 106 illik qolf meydançasının yenilənərək dünyanın ən möhtəşəm idman obyektlərindən birinə çevriləcəyini deyib. O, oktyabr ayında hazırkı meydançanı “Trash Island” adlandıraraq 15 ay davam edəcək yenidənqurma planını açıqlayıb. Prezidentin sözlərinə görə, yenilənmiş ərazi həm ictimaiyyət üçün açıq olacaq, həm də beynəlxalq səviyyəli turnirlərə ev sahibliyi edə biləcək.
Hakim Ana Reyes şənbə günü açıqladığı 30 səhifəlik qərarında administrasiyanın parkın bağlanması ilə bağlı əsaslandırmalarının formal xarakter daşıdığını və hökumətin müəyyən edilmiş vaxt çərçivəsinə əməl etmək üçün ən azı iki federal qanunu pozduğunu bildirib.
Reyes qeyd edib ki, Vaşinqton sakinlərinin gündəlik istifadə etdiyi tarixi parkın qeyri-müəyyən müddətə bağlanması ictimai maraqlara ziddir.
Mübahisə fevral ayında Kolumbiya dairəsinin Tarixi İrsin Qorunması Liqasının və digər qurumların parkın yenidən qurulması planına qarşı məhkəməyə müraciət etməsi ilə başlayıb.
Ağ Evdən təxminən 3 kilometr cənubda yerləşən qolf meydançası Milli Park Xidmətinin (NPS) Vaşinqtonda idarə etdiyi üç ictimai meydançadan biridir.
Məhkəmə mübahisəsi oktyabr ayında NPS-in yüzlərlə ağacı kəsməyə başlaması ilə daha da dərinləşib. Qurum hakimə işlərin başlanmasına cəmi 15 saat qalmış məlumat verib. Ağacların kəsilməsindən sonra Reyes administrasiyaya ən azı oktyabrın 26-dək bu işləri dayandırmağı və ərazidə digər daimi dəyişikliklər barədə üç iş günü əvvəl məlumat verməyi tapşırıb.
İşlərin dayandırılmasına baxmayaraq, Tramp meydançanın noyabrın 15-dən etibarən 15 ay müddətinə bağlanacağını açıqlayıb və yenilənmiş ərazinin layihə görüntülərini paylaşıb. O, “Truth Social” hesabında hazırkı meydançanın köhnəldiyini, yararsız vəziyyətə düşdüyünü, təhlükəli ağacların və dağılmaqda olan sahil divarının risk yaratdığını bildirib.
Bundan başqa, hakim Ədliyyə Nazirliyinin vəkillərinin məhkəməyə yanlış məlumat verib-vermədiyini və etik qaydaları pozub-pozmadığını araşdırmağa başlayıb. Araşdırma çərçivəsində yenidənqurma planları barədə məhkəməyə gec məlumat verilməsinin qəsdən edilib-edilmədiyi, əvvəlki yanlış bəyanatların düzəldilmədiyi və ya müəyyən məlumatların gizlədildiyi ehtimalları yoxlanılacaq.
Reyes araşdırmanı müstəqil üçüncü tərəf olan xüsusi ekspertin iştirakı ilə aparacağını bildirib.
23:00 15.11.2026
Oxunuş sayı: 101
