Papa Fransiskin keçmiş yeparxiyasında miqrasiya və yoxsulluq problemlərinə diqqət çəkib
Roma Papası XIV Leo Perunun şimalındakı ucqar And kəndinə səfəri zamanı daha yaxşı gələcək axtarışı ilə doğma yurdlarını tərk etməyə məcbur olan insanların çətinliklərindən danışıb.
Crossmedia.az xəbər verir ki, bu barədə “BBC” məlumat yayıb.
Təxminən 6 min nəfərin yaşadığı Santa Cruz de Succhabamba kəndində Papanın səfəri 20 minə yaxın insanı bir araya gətirib. Bu ərazi XIV Leonun əvvəlki yeparxiyasının tərkibində olub.
Açıq havada keçirilən ayində çıxış edən Papa kəndlərdə doğum səviyyəsinin azalmasının yaşayış məntəqələrinin boşalmasına səbəb olduğunu bildirib. O, həmçinin torpaq və təbii sərvətlərin qeyri-bərabər bölüşdürülməsinə diqqət çəkib.
Kəndin yerləşdiyi Kajamarka bölgəsində əhalinin 40 faizindən çoxu yoxsulluq içində yaşayır. Rəsmi məlumatlara görə, bu, Peruda ən yüksək göstəricidir. Bundan başqa, ölkə daxilində miqrasiya nəticəsində ən çox sakin itirən bölgə də Kajamarkadır. Burada doğulmuş 729 min nəfər hazırda Perunun digər ərazilərində yaşayır.
XIV Leo moizəsində onu qarşılamaq üçün səfər edənlərə təşəkkür edib və həyatın çətinliklərinə baxmayaraq ruhdan düşməməyin vacibliyini vurğulayıb.
Papanın Latın Amerikası turu təxminən bir ay əvvəl sağ ağciyərinin bir hissəsinin götürülməsi ilə nəticələnən əməliyyatdan sonra baş tutub. Müayinələr zamanı onda xərçəngli törəmə aşkarlanmışdı.
Səfərinin əvvəlində XIV Leo aldığı tibbi yardımdan danışaraq vaxtında diaqnoz və müalicə imkanları olmayan insanların vəziyyətini xatırladıb.
23:15 15.11.2026
Oxunuş sayı: 95
