Van Qoqun 180 milyon dollarlıq tablosunun satışı mübahisə yaradıb
“Chataigniers en fleurs” (“Çiçəklənən şabalıd ağacları”) adlı rəsm əsərinin hərraca çıxarılması ətrafında mübahisə yaranıb. Təxminən 180 milyon dollar dəyərində qiymətləndirilən əsərin nasistlərin hakimiyyətə yüksəlişi dövründə əvvəlki sahiblərindən məcburən alındığı iddia edilir.
Crossmedia.az xəbər verir ki, bu barədə “BBC” məlumat yayıb.
Əsərin əvvəlki sahibi olmuş alman Fişer ailəsinin varislərinin nümayəndələri bildiriblər ki, rəsm İkinci Dünya müharibəsindən əvvəl ailənin nəşriyyat şirkətinin nasistlərin hakimiyyəti dövründə üzləşdiyi maliyyə itkiləri səbəbindən Amsterdamda satılıb.
Hərrac evi “Sotheby's” isə apardığı geniş araşdırmaların rəsmin məcburiyyət altında satıldığını təsdiqləmədiyini açıqlayıb. Bununla belə, qurum ailənin nümayəndələri ilə dialoqu davam etdirdiyini və qarşılıqlı razılaşma əldə etməyə çalışacağını bildirib.
Vincent van Qoqun 1890-cı ildən sonrakı sahiblik tarixçəsi araşdırılan əsəri 1909-cu ildə tanınmış alman naşiri Samuel Fişer əldə edib. Onun 1934-cü ildə vəfatından sonra rəsm ailəsinə miras qalıb.
Əsər 1932 və ya 1933-cü ildə Amsterdamda Paul Kassirerə təhvil verilib, 1936-cı ildə isə Parisdə Henriette və Marsel Kapfererlərin mülkiyyətinə keçib. Hərraca çıxarılana qədər rəsm daha dörd sahib dəyişib.
Əsərin çərşənbə günü Nyu-Yorkda “Blaquier-Arrieta Collection” kolleksiyasının tərkibində satışa çıxarılması planlaşdırılır.
22:45 15.11.2026
Oxunuş sayı: 96
