46 yaşında möhtəşəm dönüş: Ronaldinyo yenidən futbol oynadı
Braziliya futbolunun əfsanələrindən olan Ronaldinyo 11 illik fasilədən sonra yenidən rəsmi oyunda meydana çıxıb. 46 yaşlı futbolçu İtaliyanın “Ravenna” klubunun heyətində “Forli” ilə qarşılaşmada iştirak edib.
Crossmedia.az xəbər verir ki, bu barədə "Son Dakika" məlumat yayıb.
İtaliya Serie C-nin B qrupunda keçirilən görüşə Ronaldinyo start heyətində başlayıb və ilk hissədə 46 dəqiqə meydanda qalıb. O, komandasının ilk qolunun hazırlanmasında da iştirak edib.
Braziliyalı ulduz fasilədən sonra əvəzlənib. Qarşılaşma isə “Ravenna”nın 2:0 hesablı qələbəsi ilə başa çatıb. Komandanın qollarını Giulio Donati və Simon Rabbi vurublar.
Eyni zamanda Ronaldinyo sonuncu dəfə 2015-ci ildə Braziliyanın “Fluminense” klubunun formasını geyinib. O, 2018-ci ildə peşəkar futbolçu karyerasını rəsmən başa vurub.
Braziliyalı futbolçu “Ravenna” klubunun layihəsinə 2026-cı ilin iyununda qoşulub və klubun səhmdarlarından birinə çevrilib.
Qeyd edək ki, Ronaldinyo yenidən meydana çıxmasından məmnun olduğunu bildirib. O, gələcəkdə yenidən oynayıb-oynamayacağının klub prezidenti ilə razılaşmadan asılı olduğunu söyləyib.
23:37 15.11.2026
Oxunuş sayı: 248
