Azərbaycan musiqisini xaricdə təmsil etmək doğma evinin səsini uzaqlara aparmaq kimidir - MÜSAHİBƏ
Azərbaycanlı bəstəkar və caz pianoçusu, Azərbaycan Respublikasının əməkdar artisti Elçin Şirinov beynəlxalq səhnədə fəaliyyətini davam etdirir. O, bir neçə il Avishai Cohen triosunun üzvü olmuş və bu müddət ərzində üç albom yazmış, Blue Note New York, Ronnie Scott’s (Londonda), Blue Note Tokyo, Tokyo Jazz Festival, Jazz à Vienne, Elbphilharmonie Hamburg, Berlin Philharmonic, Jazz in Marciac kimi bir çox beynəlxalq festival və konsertlərdə çıxış etmişdir.
Hazırda o, Londonda yerləşən Kings Place konsert zalında solo konsertə hazırlaşır.
Crossmedia.az-a müsahibəsində Elçin Şirinov bu və digər məsələlərə aydınlıq gətirib:
-Sizcə, Azərbaycan cazının özəlliyi nədən ibarətdir və dünya caz səhnəsində hansı fərqli notlarla seçilir?
-Mənim üçün Azərbaycan cazı etno-caz formasıdır. Necə ki, başqa ölkələrdə xalq musiqisi ilə caz sintez olunur məsələn, hind musiqisi və caz, ərəb musiqisi və caz. Onların hər biri fərqli səslənir, amma hamısının özünəməxsus, yalnız həmin bölgənin mədəniyyətinə və ənənəsinə aid bir ruhu var.
Eləcə də Azərbaycan xalq musiqisi çox emosional, poetik və ruh dolu bir musiqidir. Bu musiqi bizim torpağımızın, tariximizin və insanlarımızın hisslərini daşıyır. Belə bir mühitdə böyüməyim mənim bəstəkarlıq düşüncəmin və ifa tərzimin formalaşmasına çox təsir edib.
Uşaqlıqdan həm xalq musiqisini, həm Azərbaycan klassik bəstəkarlarını, həm də Amerika cazını dinləməyi çox sevirdim.
Hacıbaba Hüseynov və Şövkət Ələkbərova kimi möhtəşəm ifaçılarla yanaşı, Fikrət Əmirov və Qara Qarayev kimi böyük bəstəkarların əsərləri, eləcə də Miles Davis, John Coltrane və Bill Evans kimi caz ustalarının musiqiləri də mənim üçün böyük ilham mənbəyi olub.
Bütün bu musiqilər mənim daxilimdə birləşərək mənim üçün Azərbaycan cazının mənasını formalaşdırıb. o, həm milli kimliyimizin səsi, həm də azad ifadənin bir formasıdır.
-Musiqi yolunuzun ən çətin mərhələsi hansı olub?
-Musiqi yolumda ən çətin mərhələ bəlkə də özümə inamı qorumaq idi. Hər musiqiçi kimi mən də bəzən tərəddüd, yorğunluq, hətta şübhə anları yaşamışam. Amma hər dəfə musiqi mənə geri dönüş yolunu göstərib. Çətinliklər əslində inkişafın bir hissəsidir. Onlar məni həm musiqiçi, həm də insan kimi böyüdür.
-Gələcəkdə yeni albom və beynəlxalq əməkdaşlıq məsələlərində hansı planlarınız var?
-Adətən layihələrim haqqında öncədən danışmağı xoşlamıram. Mənim üçün nəticə göstərmək sözdən daha önəmlidir. Lakin demək olar ki, yeni materiallar və beynəlxalq səviyyədə maraqlı əməkdaşlıqlar üzərində iş gedir. Zamanı gələndə bu layihələri paylaşmaq mənim üçün böyük sevinc olacaq.
-İngiltərədə və dünyada Azərbaycan musiqisini tanıtmaq, təmsil etmək necə hissdir?
-Azərbaycan musiqisini xaricdə təmsil etmək sanki doğma evinin səsini uzaqlara aparmaq kimidir. Bu musiqinin qədim kökləri və dərin emosional gücü var. Hər dəfə səhnəyə çıxanda təkcə öz adımı deyil, həm də Azərbaycan musiqisini təmsil etdiyimi hiss edirəm. Bu, çox xüsusi və məsuliyyətli bir duyğudur.
Bu musiqi dünyanın istənilən yerində dinləyicilərin qəlbinə toxuna bilir və bu, mənə hər zaman ilham verir.
-Sonda gənc musiqiçilərə hansı məsləhətləri verərdiniz?
-Gənc musiqiçilərə demək istərdim ki, heç vaxt öz yolunuzdan çəkinməyin. Hər kəsin səsi və hekayəsi fərqlidir. ən vacibi, onu tapmaq və qorumaqdır. Musiqi yalnız texnika deyil, ruhdur. Ona görə də çox çalışmaqla yanaşı, dinləmək, hiss etmək və ilhamlanmaq da vacibdir.
Bəzən çətinliklər olacaq, amma o anlar sizi formalaşdırır. Səbirli olun, dürüst qalın və musiqiyə həmişə sevgi ilə yanaşın. Qalan hər şey zamanla öz yerini tapır.
10:24 30.10.2025
Oxunuş sayı: 10087
