Görmə məhdudiyyətli vətəndaşlar üçün plan yerləri artırılır
Dövlət İmtahan Mərkəzi (DİM) 2026/2027-ci tədris ili üzrə ali təhsil müəssisələrinə qəbul çərçivəsində gözdən əlil abituriyentlər üçün 15 plan yeri ayırıb. Qərar inklüziv təhsilin inkişafı istiqamətində atılan addımlardan biri kimi qiymətləndirilsə də, ayrılan yerlərin mövcud tələbatı nə dərəcədə qarşıladığı ilə bağlı müzakirələr davam edir.
Mövzu ilə bağlı təhsil eksperti Elçin Əfəndi Crossmedia.az-a açıqlamasında bildirib ki, Dövlət İmtahan Mərkəzi hər il bu istiqamətdə qərarlar qəbul edir və görmə məhdudiyyətli vətəndaşların ali təhsilə çıxış imkanlarının genişləndirilməsi üçün xüsusi plan yerləri ayırır.
Onun sözlərinə görə, məsələyə yalnız təhsil alanlar baxımından yanaşmaq düzgün deyil: “Təkcə təhsil alanları deyil, bu təhsili verən şəxsləri də nəzərə almaq lazımdır. Çünki təhsilverənlərin sayının və imkanlarının artması həmin istiqamətdə təhsil almaq istəyənlərin də sayına müsbət təsir göstərə bilər”.
Ekspert qeyd edib ki, hazırda ayrılan 15 dövlət sifarişli yer mövcud müraciət sayı nəzərə alınmaqla kifayət edir: “Hazırda 15 tələbənin dövlət sifarişi əsasında qəbulunu həyata keçiririk və onlar ödənişsiz təhsil ala bilirlər. Burada maraq və istək amili də mühüm rol oynayır. Bəzi hallarda görürük ki, görmə məhdudiyyətli vətəndaşlarımız ya ali təhsil almağa maraq göstərmirlər, ya da müraciət edənlərin sayı az olur. Buna görə də mövcud sayın hazırkı vəziyyət üçün yetərli olduğunu düşünürəm”.
E.Əfəndi vurğulayıb ki, həmin yerlər müsabiqə əsasında yüksək nəticə göstərən abituriyentlər arasında bölüşdürülür: “Təbii ki, qəbul müsabiqə yolu ilə həyata keçirilir və yüksək nəticə əldə edən abituriyentlər bu plan yerlərini qazanırlar”.
Ekspert gələcəkdə plan yerlərinin artırılmasının mümkünlüyünü də istisna etməyib. O bildirib ki, buna ehtiyac yaranacağı halda sayın artırılması gündəmə gələ bilər:
“Ən böyük arzumuz odur ki, ümumiyyətlə görmə məhdudiyyətli vətəndaşlarımız olmasın. Amma belə bir ehtiyac yaranarsa, qarşıdakı illərdə plan yerlərinin sayı 20 və ya 25-ə qədər artırıla bilər”.
Zərnigar Hüseynli
18:00 06.08.2026
Oxunuş sayı: 329
